भांगरभूंय | प्रतिनिधी
नवी दिल्ली, खबरां संस्था ः अर्थीक वर्स 2024-25 हे 31 मार्चाक सोंपता. ईपीएफओचे नेम पाळपा सावन कर बचत येवजण्यांनी गुंतवणूक करपा मेरेन सगळ्या गजालीं खातीर फकत कांय दीस उरल्यात.
हालींच कर्मचारी भविष्य निर्वाह निधी संघटनेन बँकांनी युनिव्हर्सल अकाउंट क्रमांक (UAN) सक्रिय करपाची आनी आधार सीडिंग करपाची तारीख 15 मार्च 2025 मेरेन वाडयल्ली. वेगवेगळ्या येवजण्यांचो फायदो घेवपा खातीर बेगीनांत बेगीन सक्रिय करपाक ईपीएफओन सांगिल्लें.
० युएएन हो 12 अंकांचो क्रमांक आसा आनी ताचे वरवीं कर्मचाऱ्यांक आपल्या पीएफ खात्या संबंदीत सगळी म्हायती ट्रॅक करुंक मेळटा.
० पीएफ खात्याची म्हायती सावन पासबुक डावनलोड करपा मेरेन सगळेंच हांतूत मेळटा. तशेंच तुमी पीएफ काडूंक वा हस्तांतरीत करूंक शकतात.
० कर्मचारी ठेवी-लिंक विमो येवजणे खाला विमो कव्हराचोय लाव घेवपा खातीर युएएन सक्रिय करपाची गरज आसा.
० हे विमो येवजणे खाला ईपीएफओ वांगड्यांक अनपेक्षीत घडणूक घडल्यार 7 लाख रुपया मेरेन कव्हर मेळटा.
अपडेटेड रिटर्न भरपाची निमाणी तारीक 31 मार्च
फाटल्या दोन वर्सांचे आयकर विवरणपत्र अपडेट करपाक सोदपी करदात्यांक 31 मार्चा पयलीं अपडेटेड विवरणपत्र दाखल करपाक मेळटले. ‘अपडेटेड रिटर्न’ दाखल करपाक तुमकां आयटीआर-यू (ITR-U) नांवाचो फॉर्म भरचो पडटलो.
ह्या फॉर्मांत, तुमी अपडेटेड रिटर्न कित्याक दाखल केलां हाचें कारण स्पश्ट करचें पडटलें, जशें मुजत चुकप, चुकीचे उत्पन्न निवडप, वा मूळ रिटर्नांत चुकीचो तपशील भरप आदी. अर्थ कायदो 2022 त अपडेटेड रिटर्न दाखल करपाची तरतूद केल्यां.
कर बचत गुंतवणूक करपाची निमाणी तारीख
तुमी अजून कर बचत गुंतवणूक करूंक ना जाल्यार 31 मार्च मेरेन करूंक शकतात. पोस्ट खात्याच्यो अशो 5 येवजण्यो आसात जातूंत पीपीएफ, टायम डिपॉझिट आनी सुकन्या येवजण हांचो आस्पाव जाता, जातूंत गुंतवणूक करून कर वाटोवंक मेळटा.
ज्येश्ठ नागरिक बचत येवजण
सुकन्या समृद्धी येवजण
भौशीक भविष्य निर्वाह निधी
राष्ट्रीय बचत प्रमाणपत्र
मजत ठेवी येवजण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
