भांगरभूंय | प्रतिनिधी
पणजी : कोमुनिदादचे काम संहिते प्रमाण चलचे खातीर तिसवाडी आनी फोंडें म्हालांतल्या वेंचून आयिल्ल्या कोमुनिदाद अध्यक्षां खातीर पयलेच फावट विशेश प्रशिक्षणाचें आयोजन केलां. हें प्रशिक्षण आयज (३ मार्च) दिसा कोमुनिदाद मध्य विभागाच्या पणजी कार्यालयांत जातलें. प्रशिक्षणांत प्रितिदास गांवकार मार्गदर्शन करतले अशी म्हायती कोमुनिदाद प्रशासक जयेश मयेंकार हांणी दिली. सोमारा तांणी माध्यमां कडेन संवाद सादलो.
मयेंकार हांणी सांगलें : कोमुनिदाद ही गोंयची एक इतिहासीक अशी संस्था. कोमुनिदाद संहिता (कोड) क्लिष्ट आसा. पयलेच फावट जाल्ल्या अध्यक्षांक ती समजावन सांगप, तांणी कितें करचें तशेंच कितें करचें न्हय हाची म्हायती दिवप, तांचें कर्तव्य आनी अधिकार हांची म्हायत दिवप, कोमुनिदाद विशींचें कायदेशीर आनी अर्थीक ज्ञान दिवप, बरें काम करपी कोमुनिदादची म्हायती दिवप, अश्या विंगड विंगड हेतूं खातीर ह्या प्रशिक्षणाचें आयोजन केलां.
ह्या प्रशिक्षणा वरवीं कोमुनिदाद प्रशासन घटमूट करप होय आमचो हेत आसा. प्रशिक्षणा मजगतीं अध्यक्षांक पीपीटी सादरीकरण दाखयतले. फुडाराक उपेगी पडचे खातीर आमी तांकां हें सादरीकरण हार्ड तशेंच सॉफ्ट कॉपी पद्धतीन दितले. फुडाराक हेर कोमुनिदादची वेंचणूक जाल्यार तांच्या अध्यक्षांकूय अशेंच प्रशिक्षण दितले. अध्यक्षांक गरज आसल्यार आमी तांकां कोमुनिदाद संबंदी हेर प्रशिक्षण दिवपाकूय तयार आसात, अशें मयेंकार हांणी मुखार म्हणलें.
अध्यक्षांचो सोपूत विधी
सोमारा तिसवाडींतले ३२ मदले १५ जाल्यार फोंडेंचे २८ मदले १४ नवे कोमुनिदाद अध्यक्षांचो सोपूत विधी सुवाळो जालो. हे अध्यक्ष फुडले कांय दीस तांच्या हेर पदाधिकार्यांक सोपूत दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
