अंदूंचो गीम वत आनी चड गरमीचो आसतलो

भांगरभूंय | प्रतिनिधी

नवी दिल्ली, खबरां संस्था ः अंदूं गिमांत म्हळ्यार मार्च ते मे मेरेन देशभरांतलें चडांत चड आनी उण्यांत उणें तापमान सरासरी परस चड आसतलें. मुखेलपणान उश्णताय ल्हारांचो आंकडो आनी तीव्रता वाडटली. देखून दिसांचो आनी रातच्या वेळार चड उश्णताय जाणवपाची शक्यताय आसा. दक्षीण भारतांतलीं कांय राज्यां सोडल्यार महाराष्ट्रा सयत देशभरांत अंदूं खर वत आनी चड उश्णताय आसपाचो अदमास हवामान खात्यान उक्तायला. खास करून उत्तर भारतांत आनी मध्य भारतांत चड गरमी आसपाची शक्यताय आसा. तशेंच गिमाच्या दिसांनी पावस पडपाची शक्यताय आसा. हो पावस वादळी वाऱ्या सयत येवपाची शक्यताय आशिल्ल्यान व्हड प्रमाणांत लुकसाण जावं येता असो भंय आसा.

फेब्रुवारीय सरासरी परस उश्ण?
अंदूंचो फेब्रुवारी सरासरी परस चड उश्ण आसलो. देशांत फेब्रुवारींत चडांत चड तापमान सरासरी 27.58 अंश सेल्सियस आसता. मात अंदूं 29.07 अंश सेल्सियस आशिल्लें. उण्यांत उणें तापमान 13.82 अंश सेल्सियस आसता. मात तें 15.02 अंश सेल्सियस आशिल्लें. सरासरी परस चडांत चड तापमान 1.49 अंश सेल्सियस जाल्यार उण्यांत उणें तापमान 1.20 अंश सेल्सियसान चड आशिल्लें. 1901 पसूनच्या नोंदणी प्रमाण, अंदूंचो फेब्रुवारी दुसरो सगळ्यांत उश्ण म्हयनो थारलो. फेब्रुवारी 2023 त 29.44 अंश सेल्सियस नोंद जाल्ली. देशांत फेब्रुवारींत सरासरी 21.8 मिलिमीटर पावस पडटा, अंदूं 10.9 मिमी पडलो. सरासरी परस 50.2 टक्के उणो पावस पडलो.

वाडट्या तापमानाचो परिणाम कितें?
वाडट्या तापमानाक लागून गंवाच्या पिकांचेर सगळ्यांत चड परिणाम जातलो. अंदूं देशांत 632.27 लाख हेक्टर वाठारांत गंवाची लागवड जाल्या. गंवाची लागवड सरासरी परस 7.5 लाख हेक्टर वाडल्या. ह्या गंवाची कापणी मार्च म्हयन्याच्या पयल्या सप्तकासावन सुरू जावन एप्रिलाच्या पयल्या सप्तकामेरेन चलता. पूण फेब्रुवारींत सरासरी परस उश्णताय आयल्या. मार्च म्हयन्यांत लेगीत तापमान सरासरी परस चड उरतलें असो अदमास आसा. तापमान वाडलें जाल्यार गंवाच्या उत्पादनाचेर परिणाम जातलो. मोहरी पिकाचेरुय ताचो परिणाम जातलो.
दर वर्सा गिमाच्या दिसांनी आनी जून, जुलय म्हयन्यांत पालेभाजी आनी फळांचे दर वाडटात. गिमाच्या दिसांनी चड तापमानाक लागून लागवड उणी जाता. पिकां वाडनात. उश्णतायेक लागून ल्हान वनस्पत लासूंक शकता. उदकाच्या उणावाच्या काळांत तापमान सरासरी परस चड उरल्यार पालेभाजी आनी फळां हांच्या उत्पादनाचेर परिणाम जाता. देखून वाडट्या तापमानाक लागून पालेभाजी आनी फळां हांचे दर वाडपाची शक्यताय आसा.