भांगरभूंय | प्रतिनिधी
पणजी : रस्ते अपघात आनी येरादारी नेम मोडप ही चिंता करपा सारकी गजाल. फाटलीं कांय वर्सां गोंयांत घडपी अपघातांत मुखेलपणान पर्यटकांचो हात दिसून आयला. ह्या घडणुकां मदीं विशेश म्हणल्यार रेंट अ कार वा रेंट अ बायकचो आसपाव आशिल्लो दिसता.
फाटलीं कांय वर्सां असल्या अपघातांत शेकड्यांनी लोकांक मरण आयलां. फाटल्या २४ फेब्रुवारीक राज्य येरादारी संचालनालयाचे बसकेंत नवे परवाने दिवप बंद करपाचो निर्णय घेतिल्लो. आतां ह्यान फुडें रेंट अ काराक परवाने दिवचे ना. राज्य येरादारी संचालनालयान शेनवारा हाची अधिकृत घोशणा केली.
रस्ते सुरक्षा, येरादारी कोयंडी आनी नेम पाळप ना हाचे कडेन संबंदीत चिंता लक्षांत घेवन लोकांच्या बर्या खातीर हो निर्णय घेतला. अपघातांत सांपडिल्ल्या वाहनांचो विचार केल्यार भाडेपट्टीचेर घेतिल्ल्या वाहनांचो सगळ्यांत चड वांटो आशिल्ल्याचें दिसून आयलां. पर्यटकांकडल्यान जायते फावट सोर्याचे धुंदींत निश्काळजीपणान गाडी चलोवप जाता आनी हाका लागून भिरांकूळ अपघात जातात, अशें येरादारी संचालक प्रविमल अभिषेक हांणी म्हणलें. राज्य येरादवरी संचालनालयाच्या निर्णयाचे फाटभूंयेर, तांणी एक भौशीक सुचवणी जारी करीत अर्जदारांक रेंट अ कार परवान्यां खातीर कसलेच नवे अर्ज सादर करचे न्हय असो उलो मारलो, कारण ह्या टप्प्याचेर अशा अर्जांचेर प्रक्रिया करचे ना.
आता रेंट अ कारीक लागून जरी पर्यटकांक तांचे सोयी प्रमाण जाय थंय, जाय तशें भोंवपाची मेकळीक जरी आसली तरी सोरो वा घुवळे वखदांचे घुवळेंत बेकायदेशीरपणान गाडयो चलयिल्ल्यान जायते फावट अपघात घडिल्ल्यान जायत्या जाणांनी जीव वगडायला. पयशांच्या हांयसान खाजगी वाहनांय भाड्याक दिवपाचें चलन वाडलां. राज्य येरादारी संचालनालयान हाचेर कारवाय करपाक सुरू केल्ल्यान आतां नवीन सुचवण्यो जारी केल्यात. पयलीं असो गुन्यांव करप्यांक १० हजार रुपयांचो दंड करतले. परत परत नेम मोडल्यार आनीक खर दंडाची वसुली करतले.
भाड्याक दिल्ल्या खाजगी वाहनांचो परवानो रद्दूय करपाक शकता, अशीय शिटकावणी ह्या वेळार अभिषेक हांणी दिली. संबंदीत अधिकार्यांक नेमान तपासणी करपाक आनी बेकायदो रेंट ह्या कॅबच्या ऑपरेशन्सार कारवाय करपाचे निर्देश दिले.
मजगतीं, अंदूं पयल्या दोन म्हयन्यांनी येरादारी नेम मोडिल्ल्या ५०१० रेंट अ कार आनी रेंट अ बायक्सांचेर येरादारी खात्यान कारवाय केल्या. हातूंत १३८१ रेंट अ कॅब आनी ३६२९ रेंट अ बायकांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
