भांगरभूंय | प्रतिनिधी
दिवचल: गांवगिर्या वाठारांत क्रिकेटीक उर्बा दिवपा खातीर जायत्यो सुविधा उपलब्ध करपाचो सरकाराचो यत्न आसा. आंतरराष्ट्रीय दर्जाचें क्रिकेट स्टेडियम दिवचल भागांतूच जावचें (वन- दिवचल) हाचे खातीर म्हजो पयलीं सावनूच यत्न आशिल्ल्यान ते खातीर सेगीत आपणें फाटपुरवण केल्या. ह्यान फुडें ते खातीर आमी विशेश उत्सुकताय दाखयल्या. निश्चीतपणान स्टेडियम दिवचल भागांत उबारपा खातीर आमी यत्न करतात, अशें खेळां मंत्री गोविंद गावडे हांणी सांगलें. भतग्राम महोत्सवा निमतान दिवचले आयिल्ले मंत्री गोविंद गावडे हांकां पत्रकारांनी विचारलें तेन्ना तांणी हे विशीं आपली भुमिका स्पश्ट केली.
बीसीसीआयचे समितीचेर रोहन देसाय हांची निवड जावप हें गोंयच्या क्रिकेट मळार म्हत्वाची घडणूक आसा. आपूण ताका विशेश परबीं भेटयतां अशें मंत्री गावडे हांणी सांगलें.
रोहन देसाय हांणी क्रिकेटी खातीर व्हड योगदान दिलां. हाका लागून गोंयचे क्रिकेटीक नवी दिका दिवपा खातीर तांचे विशेश यत्न उपेगी थारतले.
गांवगिर्या वाठारांत खेळाची प्रतिभा व्हडा प्रमाणांत आसा. ताका चालीक लावपाक विशेश यत्न करप, सुविधा उपलब्ध करप गरजेचें. हे नदरेन आधुनिक सुविधा उपलब्ध जावप हें आमचें धारण आसा. ताका लागून फाटलीं जायतीं वर्सां यत्न केल्ल्यान राज्यांतल्या कितल्याशाच वाठारांनी खेळां सुविधा दिवपाक सरकाराक येस आयलां.
आंतरराष्ट्रीय दर्जाचें क्रिकेट स्टेडियम दिवचलेच जावचे खातीर फाटल्या कित्याशाच वर्सां सावन विधानसभा आनी हेर माध्यमांतल्यान सेगीत उल्लेख केला. बीसीसीआयचे मुखेल सहकार्य मेळिल्ल्यान निश्चीतपणान वन ह्या गांवगिर्या वाठारांत हें स्टेडियम उबारपाचो आमचो संकल्प आशिल्ल्यान ह्या प्रस्तावाक मान्यताय मेळटली असो विस्वास खेळां मंत्री गोविंद गावडे हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
