भांगरभूंय | प्रतिनिधी
पणजी : पर्वरी उड्डाण पुलाचें काम नेटान चालू आसा. निर्धारीत प्लाना प्रमाण रस्त्यांचें रुंदीकरण आनी संबंदीत कामांय चलतात. हेच फाटभूंयेर पर्वरी वडा कडल्या श्री देव खाप्रेश्वर देवस्थानाचो वड हांगच्यान दुसरे कडेन हालोवपाचें काम सुरू जालां. उड्डाण पुलाचें काम करपी कंत्राटदारान आयज सकाळीं हे सुवातेर येवन हें झाड कापपाक सुरू केलें. श्री देव खाप्रेश्वराच्या वडान पर्वरी आनी पर्यायान पर्वरच्या लोकांनी जडणघडण पळयल्या. हांगा जावपी उदरगतीचीं कामां ताच्याच आशीर्वादान जायत चल्ल्यां. आतां हो वड काडपाचो आशिल्ल्यान हांगाचे लोकूय बरेच भावूक जाल्ल्याचें दिसलें.
बुधवार १९ फेब्रुवारीक, उच्च न्यायालयान ह्या वडा विशीं याचिका निकालांत काडीत उड्डाण पुलाच्या कामा खातीर वडाचें स्थलांतर करून दुसरे सुवातेर व्हडरपाक संमती दाखयिल्ली. तशेंच स्थलांतरा खातीर तज्ञांनी दिल्ल्या मार्गदर्शक तत्त्वांचें पालन अधिकार्यांनी करपाचे निर्देश उच्च न्यायालयान दिल्ले.
मुळांत, पर्वरी उड्डाणपुलाच्या कामा खातीर खाप्रेश्वर देवस्थानाचे २०० वर्सां परस आदलें वडाचें झाड अडखळ थारतालें. म्हणून, अधिकार्यांनी तें कापपा बदला ताचें स्थलांतर करपाचो प्रस्ताव दवरिल्लो. तशेंच, श्री देव खाप्रेश्वर ही ते सुवातेवेली स्थल देवता आशिल्ल्यान थळाव्यांनी वडाच्या स्थलांतराक आक्षेप घेत उच्च न्यायालयांत याचिका दाखल केल्ली. हे विशींचे सुनावणे मजगतीं, सरकारान, वडाच्या स्थलांतरा खातीर तज्ञांच्यो शिफारशी आनी उपाय येवजण्यो सादर केल्ल्यो.
न्यायालयान सगळ्यो सुचवण्यो मान्य केल्यो. स्थलांतर करतना घेवपी खबरदारी आनी हेर तपशील न्यायालया मुखार दवरले. हाचेर विचार करून न्यायालयान झाडाचें स्थलांतर करपाक परवानगी दिली.
एक म्हत्वाची गजाल म्हणल्यार, न्यायालयान ह्या वडाच्या स्थलांतराचें काम रान विभागाच्या अधिकार्यांच्या देखरेखे आनी नियंत्रणांत दवरपाचे निर्देशूय दिल्यात. अर्जदारान मांडिल्ल्यो तज्ञांच्यो सगळ्यो शिफारशी सरकारान विचारांत घेतल्यात. अशे तरेन, याचिका निकालांत काडल्या आनी कंत्राटदाराक काम सुरू करपाचो मार्ग मेकळो जाला.
देवळा विशीं आजूनय निर्णय ना
न्यायालयांत फकत देवस्थानाच्या वडाचो प्रस्न आशिल्लो. देवूळ हो एक वेगळो विशय आसा आनी ताच्या स्थलांतरा विशीं कसलोच निर्णय जावंक ना. हें देवूळ हांगाच दवरपाचें काय हेर कडेन हलोवपाचें हाचो निर्णय भौशीक बांदकाम विभाग घेतलें अशें सरकाराची बाजू मांडपी एजी देविदास पांगम हांणी सांगिल्लें. मजगतीं, आयज सकाळीं कंत्राटदारान देवळाच्या भागाकूय हात घाला.
जायते धर्मीक विधी, पूजा, सण ह्या खाप्रेश्वर देवळांत जातात आनी खाप्रेश्वर हो गांवचो राखणदार म्हणून जायत्या जाणांची श्रद्धा आसा. हाका लागून हें वडाचें झाड कापल्यार लोकांचे श्रद्धेचेर आनी धर्मीक भावनांचेर आघात जातलो, अशें थळाव्यांचें म्हणणें आसा.
सध्या हो वड प्रगत तंत्रज्ञानाचे मजतीन मुळा पसून हुमटून ते सुवाते वेल्यान ५ किलोमीटर पयस सांगोल्डा गांवांत रोवपाचो विचार सुरू आसा. मात हो वड देवस्थानाचो आशिल्ल्यान तो स्वयंभू आनी धर्मीक विधीचो भाग आसा. हो वड थंयच्यान हालयल्यार पुराय देवूळच दुसरे सुवातेर व्हरपा सारकें जातलें, म्हणून देवस्थान समितीनूय हाका विरोध केल्लो. पर्वरेचो राखणदारूच हेर सुवातेर वतलो ह्या विचारांनूच पर्वरीचे थळावे बेजारल्यात. हो वड कापचो वा व्हरचो न्हय, हे खातीर ग्रामस्थांनी केंद्रीय मंत्री नितीन गडकरी हांकांय निवेदन दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
