भांगरभूंय | प्रतिनिधी
हस्तकला खातें : 34 हजार गोंयकारांची नोंद
भांगरभूंय । समीप नार्वेंकार
पणजी : प्रधानमंत्री विश्वकर्मा येवजणे खाला गोंयांत 34 हजार कारागीर नोंद जाल्यात. तातूंतल्या 4 हजार जाणांनी 18 मळांचेर आपलें प्रशिक्षण पुराय केलां. पूण प्रशिक्षण पुराय केल्ल्यांनी रिणा खातीर अर्ज केल्ल्यां 4 हजार कारागिरां मदल्या फक्त 115 जाणांक हे येवजणे खाला रीण मेळ्ळां. सगळ्यांत चड मागणी शिंपी वेवसायांत आसा. ह्या मळार 18 हजार जाणांनी नोंदणी केल्या, अशी म्हायती हस्तकला, कापड आनी काथो खात्यान दिल्या.
प्रधानमंत्री विश्वकर्मा येवजणे खाला जे परंपरीक वेवसाय आसात तांकां उर्बा दिवपा खातीर ह्या वेवसायांतल्या मळार सरकार तांकां प्रशिक्षण दिवन तांचे कुशळटाय उदरगतीचेर काम करता. गोंयांत ही येवजण चालीक लावपा खातीर केंद्रान हस्तकला, कापड आनी काथो खात्याक नोडल एजन्सी म्हूण नेमला. हे येवजणे खाला खातें कारागिरांक प्रशिक्षण, टूल कीट, 15 हजार मानधन आनी वेवसाय करपा खातीर रीण मंजूर करून दिता.
खात्यान दिल्ले म्हायती प्रमाण येवजण चालीक लागत सावन 27 फेब्रुवारी मेरेन 34,005 जाणांनी हे येवजणे खातीर नोंदणी केल्या. तातूंतल्या 6287 जाणांची कुशळटाये खातीर तपासणी जाल्या आनी 4187 जाणांनी आपलें प्रशिक्षण पुराय केलां. प्रशिक्षण पुराय केल्ल्या 2122 जाणांनी रिणां खातीर अर्ज केल्यात. तातूंतल्या 219 जाणांचे अर्ज मंजूर जावन 115 जाणांनी रिणाचो लाव घेतला. जाल्यार 2878 जाणांक प्रशिक्षण खातीर मानधन मेळ्ळां.
सगळ्यांत चड 18,898 शिंपी मळा खातीर अर्ज आयल्यात. ताचे उपरांत 7381 अर्ज फुलांचो हार करपी फुलकार मळाचेर आनी 1849 अर्ज गवंडी मळार आयल्यात. जाल्यार म्हालो मळाचेर 528 अर्ज, सान्न आनी पाटले विणपी मळार 1736 अर्ज, बोट बांदणींत 18, मेस्तकामांत 1485, चर्मकार 97, खेळणी करप 192, जाळी विणप 500, सराफ 340, आवतां तयार करप 103, कुलपां तयार करप 15, धातू शिल्पी 213, कुमार 148, मुर्तिकार/ शिल्पकार 281 आनी मडवळ मळार 210 अर्ज आयल्यात.
34,005 मदले 17,116 उत्तर गोंयांतल्यान जाल्यार 16,889 अर्ज दक्षीण गोंयांतल्यान आयल्यात. उत्तर गोंयच्या 2,994 जाणांचें प्रशिक्षण पुराय जालां. तातूंतल्या 1909 जाणांनी रिणा खातीर अर्ज करून 159 जाणांचे अर्ज मंजूर जाल्यात तशेंच 92 जाणांक रीण मेळ्ळां. 1,007 जाणांक प्रशिक्षणाचें मानधन मेळ्ळां. दक्षीण गोंयांत 4,863 जाणांचें प्रशिक्षण पुराय जालां. तातूंतल्या 2,386 जाणांनी रिणा खातीर अर्ज केल्यात आनी 347 जाणांचे अर्ज मंजूर जाल्यात तशेंच 223 जाणांक रीण मेळ्ळां. 1,871 जाणांक प्रशिक्षणाचें मानधन मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
