भांगरभूंय | प्रतिनिधी
मुख्यमंत्री : गोंयांत आयज सावन आठ दीस कींग मोमोची राजवट
भांगरभूंय । प्रतिनिधी
पणजीः कार्नावाल हो गोंयच्या सांस्कृतीक पर्यटनाचें एक आंग, अशें मुख्यमंत्री डॉ. प्रमोद सावंत हांणी सांगलें.
गोंयचो पयलो कार्नावाल राजधानी पणजे शेनवारा सांजे सुरू जालो. अंदूंच्या कार्नावलाक अभिनेत्री वर्षा उसगांवकार हांणी हाजेरी लायली. मुख्यमंत्री डॉ. प्रमोद सावंत, अभिनेत्री वर्षा उसगांवकार, पर्यटन मंत्री रोहन खंवटे आनी पर्यटन खात्याच्या हेर अधिकाऱ्यांनी किंग मोमोच्या चित्ररथाक बावटो दाखयले उपरांत कींग मोमो क्लिफन फर्नांडीस हांणी कार्नावाल सुरू जाल्ल्याची घोशणा केली.
राजधानी पणजे कार्नावाल व्हडा उमेदीन मनयलो. फुडले आठ दीस गोंयांत आतां कींग मोमोची राजवट चलतली. कार्नावालांत वांटेकार जाल्ल्या नाच पंगडांनी आनी चित्ररथांनी हाजीर आशिल्ल्याचीं मनरिजवण केली तशेंच मनां जिखलीं. ह्या चित्ररथांनी गोंयची संस्कृती, दायज, परंपरीक वेवसाय प्रदर्शीत केल्ले. तशेंच पर्यावरण जतन आनी समाजीक संदेश दिलो. ह्या वेळार भारतीय नौदळान पयलेच खेपे वांटेकार जावन ‘मेक इन इंडिया’ आनी ‘आत्मनिर्भर भारत’ ही संकल्पना चित्ररथा वरवीं दाखयली. तशेंच गोंयांत अपघात नियंत्रणांत दवरपा खातीर गोंय पुलिसांनी चित्ररथाच्या माध्यमांतल्यान जागृताय घडोवन हाडली.
मुख्यमंत्री डॉ. सावंत हांणी सांगलें, पणजे कार्नावाल मनोवपा खातीर गोंयकार तशेंच देशी – विदेशी पर्यटक आयल्यात. कार्नावालाच्या दिसा येरादारीची समस्या जाता ती लोकांनी समजून घेवची.
कार्नावलांतल्यान गोंयची संस्कृती दाखोवपी सगळ्या कलाकारांची आपूण तोखणाय करता. पांच दीस चलपी कार्नावालांत गोंयकारां मदी धर्मीक एकचार सदांच दिसता. गोंयकार कसलोच भेदभाव करिनासतना सगळ्या उत्सवांनी वांटेकार जातात. गोंयांत पर्यटन वाडोवपा खातीर कार्नावाल, शिगमो अश्या पद्दतीचे वेगवेगळे महोत्सव आयोजीत करतात. कार्नावल हें गोंयच्या सांस्कृतीक पर्यटनाचेच एक आंग आसा, अशें मुख्यमंत्र्यान सांगलें.
एक गोंयकार म्हूण कार्नावाला कडेन आपल्यो ल्हानपणच्यो खूब यादी जोडिल्ल्यो आसात, अशें अभिनेत्री वर्षा उसगांवकार हिणें सांगलें.
आपल्याक सदांच दिसतालें, कींग मोमोच्या राणी मदली आपूण आसची, बरें कपडें न्हेसून शिंवासनाचेर बसचें. पूण ह्या वर्सा कार्नावालाक मानेस्ता वांगडार एक सुवात दिवन आपल्याक कार्नावालाक बावटो दाखोवपाक मेळ्ळो, हाची वेगळीच खोशी जाता. एक काळ असो आशिल्लो, कार्नावालाक पर्यटक येताले, पूण तो तितलो आंतरराष्ट्रीय जावंक नाशिल्लो. आयचे पिळगेन तो संवसारीक पांवड्यार व्हेला, अशें उसगांवकार हिणें सांगलें. गोंयांत कार्नावाल फाटलो कितलोसोच तेंप उर्जा, तेज, संस्कृती हाचें प्रतीक जावन आसा. थळाव्यां वांगडा देशी आनी विदेशी पर्यटक हातूंत वांटेकार जातात. आमकां कार्नावालांतल्यान संस्कृताय, परंपरा, दायज आनी जेवण-खाण दाखवोन आमी सगळ्यांक आस्पावन घेतात, अशे पर्यटन मंत्री रोहन खंवटे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
