भांगरभूंय | प्रतिनिधी
183 अर्जांचेर कार्यवाही ; 26 जाणांक मंजुरी
भांगरभूंय । प्रतिनिधी
पणजी : अनधिकृत बांदकामां नियमीत करपा संबंदांत शेनवारा मडगांवां घेतिल्ले विशेश मोहिमेंत 183 अर्जांचेर कार्यवाही केली. तातूंतले 96 अर्ज निकालांत काडले. तातूंतल्या 26 जाणांच्या अर्जांक मंजुरी दिली, जाल्यार 62 अर्ज भायर मारले. सध्याचे स्थितींत दक्षीण गोंयांतले 1,150 अर्ज प्रलंबीत आसात.
गोंय अनधिकत बांदकाम नियमन कायदो 2016 खाला दक्षीण गोंयांत प्रलंबीत आशिल्ले अर्ज निकालांत काडचे खातीर शेनवारा उपजिल्होधिकाऱ्या कडल्यान खास मोहीम हातांत घेतली. हे मोहिमे वेळार मामलेदारां सयत भौशीक बांदकाम (पीडब्ल्यूडी), नगरनियोजन (टीसीबी) आनी रान खात्याच्या अधिकाऱ्यांक हाजीर रावपाचे आदेश सरकारान दिल्ले. ते प्रमाण शेनवारा ही विशेश मोहीम हातांत घेतली.
28 फेब्रुवारी 2025 मेरेन दक्षीण गोंयांत अशे तरेचे 1,246 अर्ज प्रलंबीत आशिल्ले. तातूंतल्या 183 अर्जांचेर कार्यवाही जाली. ह्या वेळार जाल्ले सुनावणेंत 26 जाणांच्या बांदकामांक नियमीत करचे खातीर परवानगी दिली, जाल्यार 62 जाणांचे अर्ज भायर मारले.
28 फेब्रुवारी आदीं बांदकाम केल्ल्या कोणाचेंय नांवनिर्देशन करचे खातीर सरकारान गोंय अनधिकृत इमारत नियुक्ती कायदो पास केलो आनी जाणें संबंदीत पंचायत/ नगरपालिके कडल्यान रुपांतरण डीडी, बांदकाम परवानो वा एनओसी घे नासतना बांदकाम केलां, अश्यांक अर्ज करचे खातीर सुरवेक 210 दिसांची मुजत दिली. ही मुजत सोंपले उपरांत परतून एकदां मुजतवाड दिली. ते उपरांत 2023 त सरकारान कायद्यांत सुदारणा केली. ते खातीर गोंय अनधिकृत बांदकाम नियमन दुरुस्ती विधेयक मंजूर केलें. तातूंत लेगीत 28 फेब्रुवारी 2014 आदींचें बांदकाम दिवपाची तजवीज कायम दवरली. ह्या कायद्या प्रमाण दोनूय जिल्ह्यांतलीं अनधिकृत बांदकामां नियमीत करचे खातीर सरकारान सरकारान नेटाच्यो हालचाली सुरू केल्यात. ते खातीर दक्षीण गोंयांत शेनवारा विशेश मोहीम हातांत घेतिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
