भांगरभूंय | प्रतिनिधी
पेडणें ः आगरवाडो चोपडें, पार्शें आनी मोरजे गांवांचे बदलिल्ले पिनकोड पोस्ट खात्यान परतून पयलीं सारकें केल्या. पणजेच्या मुखेल पोस्ट खात्यान तशें एक परिपत्रक जारी केलां. देखून तिनूय गांवांच्या नागरिकांनी समाधान उक्तायलां आनी केंद्रीय मंत्री आनी उत्तर गोंयचे खासदार श्रीपाद नायक हांचे उपकार मानल्यात. हे संबंदी आगरवाडो चोपडें, पार्शें आनी मोरजे नागरिकांच्या शिश्टमंडळान खासदार आनी केंद्रीय मंत्री श्रीपाद नायक हांकां मेळून बदलिल्लो पिन कोड क्रमांक परतून पयलीं सारकोच करचो अशी मागणी केल्ली ते प्रमाण नायक हांणी ही गजाल पोस्ट खात्याचे वरिश्ठ अधिकाऱ्यां मेरेन पावयिल्ली.
हे संबंदीं सविस्तर म्हायती म्हळ्यार, आगरवाडो चोपडें, पार्शें आनी मोरजे गांव पयलीं पेडणें पोस्ट खात्याच्या अधिकार क्षेत्रांत आशिल्ले, देखून फाटल्या कांय वर्सां सावन हांगाचो पिन कोड 403512 आशिल्लो. थंयच्या दरेका नागरिकांच्या सरकारी कागदपत्रां आधार कार्ड, पॅन कार्ड, मतदार आयडी कार्ड हांचेर ताची नोंद आशिल्ली. मात फाटल्या म्हयन्यांत हो पिन कोड बदलून आगरवाडो चोपडें आनी पार्शें गांवचो शिवोले पोस्टांत आस्पाव करून 403517 पिन कोड चालीक लायलो. तशी प्रक्रियाय सुरु जाल्ली.
मोरजे गांव हरमल पोस्टाच्या अधिकार क्षेत्रांत हाडून 403527 पिन कोड दिल्लो. पिनकोड बदलिल्ल्यान 16 हजारां परस चड नागरिकांक आधार कार्ड, मतदान वळख पत्र, पॅन कार्ड आनी हेर सरकारी आनी गरजेच्या कागद पत्रांत पिनकोड बदलचो पडटलो आसलो. ताका लागून थळाव्या नागरिकांनी हाचे आड आवाज काडपाक सुरवात केली.
पणजेंतल्या पोस्ट मास्टर जनरल, सुपरिटेंड, थळावे आमदार, आनी खासदार हांचे कडेन निवेदनां सादर केल्ली तशेंच आंदोलनाचीय शिटकावणी दिल्ली. हाची दखल घेवन पणजी मुखेल पोस्ट खात्याचे संचालक आर आर पाटील हांणी पिनकोड पयलीं आसले तेच करपाचे आश्वासन दिल्लें. ते प्रमाण आतां आगरवाडो चोपडें, पार्शें आनी मोरजे गांवांचे बदलिल्ले पिनकोड पोस्ट खात्यान परतून पयलीं सारकें केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
