भांगरभूंय | प्रतिनिधी
व्हायट हावसांत जाल्लें बसकेत झेलेन्स्की आनी ट्रम्प हांचे मदीं वाद
न्यूयॉर्कः अमेरिकेचे राष्ट्राध्यक्षपद घेतले उपरांत डोनाल्ड ट्रम्प हांणी जायते निर्णय घेतल्यात. तांणी रशिया-युक्रेन झूज थांबवपाकूय फुडाकार घेतला अशें दिसता. तांणी युक्रेन-रशिया झुजा विशीं चर्चा करपा खातीर युक्रेनचे राष्ट्राध्यक्ष वोलोदिमिर झेलेन्स्की हांकां अमेरिकेंत आपयल्ले. मजगतीं, काल व्हायट हावसांत झेलेन्स्की आनी ट्रम्प हांचे मदीं जाल्ली बसका वादग्रस्त थारल्या. तशेंच दोगांय फुडाऱ्यां मदीं वाद जाल्ल्याचे दिसून आयलें. उपरांत डोनाल्ड ट्रम्प हांणी म्हणलें, झेलेन्स्की जेन्ना शांतताये खातीर तयार जातले तेन्नाच तांणी परतून येवचे.
म्हाका शांतताय जाय
म्हाका दिसतां, जर अमेरिकेन वांटो घेतल्यार युक्रेनचे राष्ट्राध्यक्ष झेलेन्स्की शांतताये खातीर तयार ना, कारण तांकां दिसता आमचो वांटो तांकां वाटाघाटींत व्हड फायदो दिता. म्हाका फायदो नाका, म्हाका शांतताय जाय. तांणी ओव्हल ऑफिसांत अमेरिकेचो अनादर केलो. जेन्ना ते शांतताये खातीर तयार जातले तेन्ना तांणी परतून येवचें अशें ट्रम्प हांणी सोशल मिडियाचेर केल्ल्या पोस्टांत बरयलां.
तिसऱ्या म्हाझुजाचेर जुगार खेळटात
डोनाल्ड ट्रम्प हांणी आपल्या पोस्टांत फुडें सांगलें, तुमचे कडेन सध्या कसलीच कार्डां नात, तुमी तिसऱ्या म्हाझुजाचेर जुगार खेळटात. आयज व्हाइट हावसांत आमची एक बसका जाली, आनी युक्रेनचे अध्यक्ष झेलेन्स्की आजून शांतताये खातीर तयार ना हें म्हज्या लक्षांत आयलें. तांणी अमेरिकेचो अनादर केला अशें तांणी सांगलें.
झेलेन्स्कीन कितें म्हणलें?
व्हायट हावसांतल्या घडणुके उपरांत युक्रेनचे राष्ट्राध्यक्ष वोलोदिमिर झेलेन्स्की हांणी म्हणलें, हल्ल्या आड सुरक्षा हमी मेळना तो मेरेन आपलो देश रशिये कडेन शांततायेत चर्चा करपाक वांटो घेवचो ना. अमेरिकेचे राष्ट्राध्यक्ष डोनाल्ड ट्रम्प हांचे कडेन जाल्ले बसके वेळार जाल्लो वाद दोनूय देशां खातीर बरी गजाल न्हय. युक्रेन रशिये विशीं आपलो दृश्टीकोन एका खिणाक बदलूंक शकना हें ट्रम्प हांणी समजून घेवपाची गरज आसा.
खरें म्हणल्यार अमेरिकेचे राष्ट्राध्यक्ष डोनाल्ड ट्रम्प हांची युक्रेन खंयच्याय स्थितींत झुज आडावपा खातीर तयार रावचें अशी इत्सा आशिल्ली, हाका लागून झेलेन्स्की हांकां अमेरिकेक भेट दिवपाक आपयले. पूण झेलेन्स्की पुतिन कडेन कसलीच तडजोड करपाक तयार दिसनाशिल्लें. संवादांत तांणी पुतीन हांकां खूनी लेगीत म्हणलें. तांचे हें वागणुकेचेर राष्ट्राध्यक्ष ट्रम्प खूब तिडकल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
