भांगरभूंय | प्रतिनिधी
नवी दिल्ली, खबरां संस्था ः सर्व्हायकल पेन ही एक सामान्य समस्या. हातूंत मान वा खांद्या भोंवतणी दुखता आनी तकली जड जाल्ल्या सारके जाणवता. ही समस्या आशिल्ल्या मनशाक मान घुंवडावपाक, तकली वयर काडपाक वा कुडीची हेर सामान्य हालचाल करपाक खूब अडचणी येतात. केन्ना केन्ना हे दुखणे चड काळ तिगता. अशे परिस्थितींत ही समस्या वेळार सोडोवंक ना जाल्यार ती सामकी गंभीर जावंक शकता.
‘द लॅन्सेट’ ह्या दिसाळ्यांत उजवाडाक आयिल्ल्या एका अभ्यासा प्रमाण, 2020 त संवसारभरांतल्या 203 दशलक्ष लोकांक सर्व्हायकल पेनची समस्या जाली. 2050 मेरेन संवसारांतल्या सर्व्हायकल पेनची समस्या आशिल्ल्या लोकांचो आंकडो सुमार एक कोटी मेरेन पावतलो अशें ह्या अभ्यासात सांगलां.
नॅशनल लायब्ररी ऑफ मेडिसीनांत उजवाडाक आयिल्ल्या एका अभ्यासा प्रमाण, भारतांतल्या सुमार 14% प्रौढांक जिणेंत केन्ना ना केन्ना सर्व्हायकल पेन जाता. हे आंकडेवारी प्रमाण आयज संवसारभर सर्व्हायकल पेन ही एक मुखेल समस्या आसा.
सर्व्हायकल पेन म्हणल्यार कितें?
सर्व्हायकल पेन ही हाडां संबंदीत समस्या. हातूंत मनशाक मान वा खांद्या भोंवतणी दुखता. वैजकी भाशेत ताका ‘सर्व्हायकल स्पॉन्डिलायटिस’ अशें म्हण्टात. खंयचेय पिरायेचेर सर्व्हायकल पेनची समस्या जावंक शकता. हालींसराक लोक चड वेळ एकाच स्थितीत बसून स्मार्टफोनाचो वापर वा काम करतात. सर्व्हायकल पेनाचे हें एक मुखेल कारण.
कारणां
सर्व्हायकल पेनाची जायतीं कारणां आसात. तातूंत फोन वापरतना चड वेळ एकाच स्थितींत बसप, लॅपटॉप वा संगणकाचेर चड वेळ काम करप, अस्वस्थ आहार, ताण हांचो आस्पाव जाता. हाचेभायर पिराय वाडतना सर्व्हायकल पेनाच्यो समस्याय निर्माण जावंक शकतात.
पेनची लक्षणां
सर्व्हायकल पेन मानाच्या सकयल्या भागांतल्यान खांद्यामेरेन आनी केन्ना केन्नाय तकले मेरेन पातळूंक शकता. केन्ना केन्नाय सर्व्हायकल पेनाक लागून घुंवळ येवपाक शकता तशेंच मान वळोवपाक त्रास जावप, हातां-पायांक मुंयो येवप, मान वळयतना आवाज येवप, तकली दुखप. अशा लक्षणां कडेन आडनदर करुं नाकात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
