भांगरभूंय | प्रतिनिधी
नवी दिल्ली, खबरां संस्था ः देशभरांत बेगीनूच इलेक्ट्रीक व्हर्टिकल टेक-ऑफ अँड लँडिंग एअर ॲम्ब्युलन्स सेवा सुरू जातली. हे खातीर भारतान एक अब्ज डॉलराची कबलात केल्या. ह्या करारा खाला आयआयटी मद्रासांतली इलेक्ट्रीक एअरक्राफ्ट स्टार्टअप ‘ई प्लेन कंपनी’ 788 एअर ॲम्ब्युलन्स पुरवण करतली. ह्यो 788 इलेक्ट्रीक व्हर्टिकल टेक-ऑफ अँड लँडिंग एअर ॲम्ब्युलन्स भारतांतल्या मुखेल एअर ॲम्ब्युलन्स कंपनीक पावयतले.
भारतांतल्या कांय मुखेल स्टार्टअपांनी इलेक्ट्रिक व्हर्टिकल टेक-ऑफ अँड लँडिंग एअर ॲम्ब्युलन्स तयार करतात तातूंत आर्चर एव्हिएशन, सरला एव्हिएशन, आनी ई-प्लेन कंपनी हांचो आस्पाव आसा. एअर एम्ब्युलन्स सारकिल्या गरजेच्या सेवां खातीर ई-प्लेन कंपनी 2026 वर्साच्या निमाण्या तिमाहींत काम सुरू करपाचो हेत दवरता. कंपनीची उत्पादन क्षमताय दर वर्साक 100 युनिट आसतली अशें कंपनीचे संस्थापक सत्य चक्रवर्ती हांणी खबरां एजन्सी रॉयटर्साक दिल्ले मुलाखतींत सांगलें.
ह्या विमानांत एक पायलट, पॅरामेडिक, दुयेंती, स्ट्रेचर, गरजेची वैजकी उपकरणां आनी वैजकी किट आसतले. एअर ॲम्ब्युलन्सची गती वराक 200 किलोमीटर आनी दर बॅटरी चार्जाक 110 ते 200 किलोमीटर इतली रेंज आसतली. एअर ॲम्ब्युलन्सच्या पांखांचो विस्तार आठ मीटर आसतलो. देखून ही एअर ॲम्ब्युलन्स घराच्या छप्पराचेर वा रस्त्या कुशीक लेगीत देंवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
