भांगरभूंय | प्रतिनिधी
पणजी : राज्यांत फाल्यां सावन कार्नावाल महोत्सव सुरू जाता. मुळांत हो उत्सव आयज २८ फेब्रुवारीक पर्वरीच्यान सुरू जावपाचो आशिल्लो. मात पर्वरी उड्डाणपुलाचें काम आनी येरादारी वेवस्थेचेर पडपी ताण लक्षांत घेवन पर्यटन खात्यान तो रद्द केला. हाका लागून फाल्यां १ मार्चाक पणजे किंग मोमोची ‘खायात, पियात, मजा करात’ राजवट सुरू जातली. राजधानींत सध्या तयारेक नेट आयला. विवीध सुवातांचेर सोबितीकरण आनी हेर कामां चालू आसात. सर्कला कडेन सुंदर अशी सजावट केल्ली पळोवपाक मेळटा.
मजगतीं, पणजे सध्या स्मार्ट सिटीचेंय काम चलता. लोकांक धूल्ल प्रदूशण आनी येरादारी कोयंडीक सेगीत तोंड दिवचें पडटा. फाल्यां कार्नावालाक लागून कितें सोंसचें पडत? हाचो विचार करून कामाक वतल्यांचेर ताण आयला. मजगतीं, येरादारी पुलीस, पालिका प्रशासन, पर्यटन खातें आनी संबंदीत स्टेक होल्डर्स हांचे बसकेंत कागदोपत्री तरी तोडगो काडिल्ल्याचें समजता. खास करून कार्नावाला दिसा पणजेंतली भौशीक येरादारी बंद आसता. खाजगी गाडयांक लागून येरादारी ची व्हडली कोंयडी जाता.
मेळिल्ले म्हायती प्रमाण, कार्नावालच्या आयोजनांत वांटेकार जाल्ल्या सगल्या घटकांनी चर्चा करून, व्यापक नदरेन येरादारी वेवस्थेचो प्लान तयार केला. हातूंत सुरवातेक चित्ररथांची रांग ही सांता मोनिका जेटी पसून सुरू करतले, दनपरां ३.३० वरांचेर प्रत्यक्ष चित्ररथ मिरवणूक सुरू जातली. येरादारी पुलिसांनी खंयच्यान खंय आनी कशें वयचें हाचेरूय म्हायती जारी केल्या.
येरादारी वेवस्था
ते प्रमाण, २८ फेब्रुवारी रातचें १० वरां पसून दिवजा सर्कल ते रायबंदर- मेरशी बायपास जंक्शन मजगतीचो रस्तो येरादारी खातीर बंद करतले. उपरांत फाल्यां दनपरां २ वरां पसून चित्ररथ सांतामोनिका जेटी ते आदल्या सचिवालया मार्गान वतले. थंयच्यान चित्ररथ मिरवणूक कला अकादमी, कांपाल हांगा सोंपतली आनी उपरांत हे सगळे चित्ररथ फुटबॉल ग्रावंडार उबे करतले. केटीसी सर्कला वेल्यान दिवजा सर्कला कडेन येवपी येरादारी मेरशी बायपास मार्गान रायबंदर कॉजवेचे दिकेन वळोवपाचो प्लान आसा.
येरादारी खात्यान जारी केल्ल्या मार्गदर्शक तत्वां प्रमाण, नो-पार्किंग झोन तयार केल्यात. जड वाहनांक बंदी आसा. हातूंत पणजे येवपी आनी वचपी वाहनां खातीर मार्ग निर्देशीत केला. पणजे येवपी वाहनांनी पाटो ब्रिज – दिवजा सर्कल एमएलसीपी पार्कींग मार्गान शारांत प्रवेश करचो. बांबोळे वटेन येवपी गाडयांनी मळो ब्रिज, फोर पिलर जंक्शन भाटले मार्गान पणजे प्रवेश करचो. फ्लोट परेड सुरू जाले उपरांत शारांत बस येरादारी बंद उरतली. रायबंदर सावन पणजे येवपी गाडयो मेरशी अंडरपास एनएच-४ ए मार्गान पणजे वळयतले.
पणजेच्यान भायर सरपी गाडयांनी असो प्रवास करचो : मिरामारचे वटेन येवपी वाहनांनी कांपाल फायर ब्रिगेड जंक्शन, सांतिनेज जंक्शन, काकुलो आयलँड, १८ जून रोड, चर्च स्क्वेअर, आदलो पाटो ब्रिज वा मळो ब्रिज मार्गान भायर सरचें. मजगतीं, रूआ-दि-ओरेमाच्यान येवपी वाहनांक हॉटेल सोना हांगा दावे कडेन वळोवपाक मनाय आसतली. ताचे बदला हीं वाहनां काजू दरबारा कडेन वळयतले. शक्यतो सांतिनेझ, ताळगांव, मिरामार, दोनापावला हांगा वचपी वाहनांनी फाल्यां पुरतें मळा- भाटलें वा गोंय विद्यापीठ मार्गाचो वापर करचो. शारांतले येरादारीचेर पडपी ताण हाका लागून कांय प्रमाणांत उणो जातलो. प्रवासी आनी नागरिकांनी सहकार्य करचें असो उलो येरादारी पुलीस अधिक्षकांनी मारलो.
मजगतीं, आनीक एके म्हायती प्रमाण, जुझे फाल्कांव रोड, जुआंव कास्त्रो रोड, मॅच कॉर्नर ते कांसा इंटरनॅशनल (एम.जी. रोड), काकुलो आयलँड ते सांतइनेज जंक्शन, चर्च स्क्वेअर ते कोर्टीन फूट ब्रिज हो भाग नो-पार्कींग झोन जाहीर केला.
बशींक मुखेल शारांत बंदी
सगल्यांत म्हत्वाचें म्हणल्यार, पणजे फाल्यां सकाळीं ७ ते रातच्या ९ वरां मेरेन जड वाहनांक बंदी आसतली. दनपरां दोन वरां उपरांत बसी आनी हेर कमर्शियल वाहनांक मुखेल शारात बंदी आसतली. उत्तर गोंयच्यान येवपी वाहनां ईडीसी प्लाझा, एमएलसीपी आनी केटीसी बसस्टॅण्ड वाठारांत पार्क करपाची वेवस्था केली. जाल्यार दक्षीण गोंयच्यान येवपी वाहनां जीएमसी, गोंय विद्यापीठ, एनआयओ सर्कल, मिरामार मार्गान कांपाल परेड मैदानार पार्क करपाची सुविधा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
