भांगरभूंय | प्रतिनिधी
मडगांव: पिंगाळ असोल्डें केप्यां माड मारपा खातीर सिलिस्ट्रे फिलीप (पिराय 60, रा. चांदर) हे माडार चडिल्ले. ह्या वेळार माडा वेल्यान पडून तांकां गंभीर दुखापत जाली. कुडचडें भलायकी केंद्रांत उपचारा खातीर व्हरतकच तांकां उपचारा वेळार मरण आयलें. केपें पुलिसांनी असैमीक मरण म्हूण ह्या प्रकरणाची नोंद केल्या.
केपें पुलिसांक कुडचडेंच्या भलायकी केंद्रांत सिलिस्ट्रे फिलीप हाका मरण आयिल्ल्याची म्हायती मेळ्ळी. तांणी कुडचडें भलायकी केंद्रांत चवकशी केली तेन्ना सिलिस्ट्रे फिलीप पेद्रो फ्रान्सिस्को मार्टीन हे माडा वेल्यान पडिल्ल्याचें समजलें. सिलिस्ट्रे हे चांदरचे आनी माड मारपा खातीर पिंगाळ असोल्ड्यां गेल्ले. माडार चडून ते माड मारीत आसतना तोल गेल्ल्यान सिलिस्ट्रे जमनीर कोसळ्ळे. हातूंत तांकां गंभीर दुखापत जाली.
तांकां रोखडेच कुडचडेंच्या भलायकी केंद्रांत उपचारा खातीर दाखल केलो. पूण उपचारा वेळार तांकां मरण आयलें. केपें पुलिसांनी ह्या प्रकरणाची असैमीक मरण म्हूण नोंद केल्या. दक्षीण गोंय जिल्हो हॉस्पिटलांत मरणा उपरांतची तपासणी केली आनी कूड निमाण्या संस्कारा खातीर कुटुंबाचे सुवादीन केली.
ह्या प्रकरणाचो केपेंची बायल पुलीस उपनिरिक्षक जॉयसी कार्व्हालो हांणी तपास केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
