भांगरभूंय | प्रतिनिधी
सुमार 10 वर्सांनी 10 ते 20 टक्क्यांनी वाडयलो करः दामोदर शिरोडकार
मडगांव: पालिका वाठारांतल्या बांदकामांचें दर हे राज्य सरकारा कडल्यान जे तरेन अधिसुचीत केल्ल्या दरा प्रमाण हाचे आदींच वाडयल्यात. घरपटी, वेपार परवानो, जल्म आनी मृत्यू प्रमाणपत्र, उत्पन्नाचो दाखलो आनी हेर कर हे फाटल्या धा वर्सां सावन वाडोवंक नाशिल्ले. तातूंत आतां मोटी वाड करिनासतना फक्त धा ते वीस टक्क्यां मेरेन वाड केल्ल्याची म्हायती नगराध्यक्ष दामोदर शिरोडकार हांणी दिली.
मडगांव पालिकेची खाशेली बसका बिरेस्तारा सकाळीं नगराध्यक्ष दामोदर शिरोडकार हांचे अध्यक्षताये खाला पालिकेच्या सभाघरांत जाली. हे बसके उपरांत नगराध्यक्ष शिरोडकार हांणी सांगलें, मडगांव पालिका ही ‘अ’ दर्जाची पालिका आसा. ताका लागून ह्या पालिका वाठारांतले दर हे हेर पालिकां वाठारा परस चड आसूंक शकतात. कायद्या प्रमाण दर वर्सा कराचे रकमेंत धा टक्के वाड करपाचो अधिकार पालिका प्रशासनाक आसता. पूण खूबशीं वर्सा कराचे रकमेंत वाड करूंक नाशिल्ली. आतां हो विशय हातांत घेवन कराचे रकमेंत गरज आसा थंय 10 ते 15 टक्के वाडोवपाचो निर्णय घेतला. घरपटी वर्सभराची भरली ना जाल्यार हेर पालिका वर्सभराचे रकमेचेर 12 टक्के कळंतर लावन ती रक्कम भरून घेतात. ही पद्दत अजून लेगीत मडगांव पालिका प्रशासना कडल्यान राबयिल्ली ना.
जे भरतात तांचे घरपटयेंत वाड करिनासतना जे अर्थीक वर्सांत घरपटी भरिनात तांकां 12 टक्के कळंतर लावपाचो निर्णय घेतला. आस्थापन हस्तांतरण कराचे रकमेंत 1 हजारांची वाड जाल्यार रगताच्या नात्याचो नासल्यार ही रक्कम पांच हजार केल्या. वेवसायीक आस्थापनांच्या कराचे रकमेंत 1 हजारांची वाड केल्या. धा वर्सा कराचे रकमेंत वाड केल्या, पूण तरी लेगीत 50 ते 100 टक्के वाड करिनासतना 20 टक्क्यां मेरेन वाड केल्ल्याचें नराध्यक्ष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
