भांगरभूंय | प्रतिनिधी
पर्यटन खात्यान केली अचकीत तपासणी
पणजी: गोंय सरकाराच्या पर्यटन खात्यान राज्यांतल्या विवीध सुवातांचेर बीच शॅकांच्या कामाची अचकीत तपासणी केली. हे तपासणेंत गोंय शॅक धोरणाचे नेम पाळिनाशिल्ल्याचें उक्ताडार आयलां. हातूंत शॅक भाड्याक दिवपाच्या घडणुकांचोय आसपाव आसा. हाका लागून नेम मोडिल्ल्यांक कारणां नोटीस दिल्या. हे तपासणे मजगतीं, अधिकार्यांक फकत उत्तर गोंयांत वट्ट ८० नेम मोडिल्ल्याची प्रकरणां दिसून आयलीं. जातूंत शॅक भाड्याक दिवपाचोय आसपाव आसा. गोंय शॅक धोरणा खाला ह्या शॅकांक नोटीस धाडल्यात. जाल्यार दक्षीण गोंयांत १९ शॅक्सांनी नेम मोडल्यात.
शॅकांनी जावपी बेकायदेशीर प्रकार उक्ताडार हाडपा खातीर आनी धोरणाचे नेम पाळटा काय ना हें निश्चीत करपा खातीर ही तपासणी केली.
पर्यटन खात्याच्या अधिकार्यांनी सांगलें, शॅक्सांक कारणां दाखयात नोटीस दिली. शॅक धनयांक फेब्रुवारीच्या निमाण्या सप्तकांत जावपी सुनावणे मजगतीं तांची बाजू मांडपाची संद दितले. आतां मेरेन कसलोच दंड दिवंक ना आनी सुनावणेची प्रक्रिया चालूच आसा. फुडल्या तपशिलांत, बिगर गोंयकारां खातीर भाड्यान दिल्ल्या शॅकांचो आंकडो आनी तातूंत गुंथिल्ल्या वेवसायांची पुश्टी करपाचें काम उरलां.
मजगतीं, नेमान तपासणी चालूच उरतली आनी फुडाराक नेम मोडिल्ल्या खंयच्याय प्रकाराचेर कारवाय करतले, हें अधिकार्यान खरपणान सांगलें. अश्या नेम मोडिल्ल्यांची फाटपूरवण करपा खातीर आशिल्ल्या यंत्रणा विशीं खात्यान अशें थारायलां, नेम पाळिनाशिल्ल्याचें निरीक्षण करपा खातीर नेमान तपासणी करतले.
सध्या, उत्तर गोंयचे शॅक वाटपा खातीर, प्रतीक्षा वळेरेंतल्या अर्जांच्या संख्ये विशीं म्हायती संकलीत करतात. अधिकार्यांनी अशेंय स्पश्ट केलें, तपासणे मजगतीं मेळिल्ले नेम मोडिल्ल्यांच्या आदारार नोटीचो जारी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
