भांगरभूंय | प्रतिनिधी
नवी दिल्ली, खबरां संस्था ः फाटल्या कांय दिसां सावन वक्फ बोर्ड विधेयकाचेर चर्चा सुरू आसा. अर्थसंकल्पीय अधिवेशनाच्या पयल्या टप्प्यांत हें विधेयक संसदेंत मांडलें. पूण उपरांत तें संसदीय समिती कडेन धाडलें. समितीन केल्ल्या शिफारशींतल्या 44 शिफारशींक मान्यताय मेळ्ळी जाल्यार 14 शिफारशी विचारा खातीर घेतल्यो. आतां केंद्रीय मंत्रीमंडळान ह्या 14 बदलां सयत वक्फ बोर्ड विधेयकाच्या सुदारीत मसुद्याक मान्यताय दिल्या. आतां अर्थसंकल्पीय अधिवेशनाच्या दुसऱ्या टप्प्यांत विधेयक संसदेंत मंजूरी खातीर सादर करतले.
संयुक्त संसदीय समितींत सत्ताधारी राष्ट्रीय लोकशाय आघाडीच्या घटक पक्षांच्या वांगड्यांनी वट्ट 14 शिफारशी केल्यो जाल्यार विरोधी पक्ष इंडिया आघाडीच्या वांगड्यांनी ह्या विधेयकांत 44 बदल करपाची सुचोवणी केल्यो. पूण वक्फ बोर्ड विधेयकांत विरोधकांनी सुचयल्ल्या सगल्या 44 शिफारशींक मान्यताय मेळूंक ना. जाल्यार सत्ताधारी एनडीएच्या वांगड्यांनी सुचयल्ल्या 14 शिफारशींक मान्यताय मेळ्ळी. 27 जानेवारी 2025 दिसा संयुक्त संसदीय समितीन ह्यो शिफारशी मंजूर केल्ल्यो. आतां ताका केंद्रीय मंत्रीमंडळाची मान्यताय मेळ्ळ्या.
अर्थसंकल्पीय अधिवेशनाचो दुसरो टप्पो 10 मार्चा सावन सुरू जाता. ह्या काळांत विधेयकाचो सुदारीत मसुदो संसदेंत मान्यताये खातीर सादर करतले. हातूंत आस्पाव केल्ल्या 14 सुदारणां मदीं वक्फ बोर्डाची मालमत्ता संकेतथळार नोंद करपा खातीर स म्हयन्यांची मर्यादा सूट दिवप, मालमत्ता वक्फ बोर्डाची आसा कांय सरकाराची आसा हें थारावपाचो अधिकार जिल्लो जिल्होधिकाऱ्या कडल्यान सरकारान नेमिल्ल्या अधिकाऱ्यांक हस्तांतरीत करप आनी मुसलमान कायदो आनी तत्वांची म्हायती आशिल्ल्या व्यक्तीची वक्फ लवादात नेमणूक करप ह्यो तीन म्हत्वाच्यो सुदारणा मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
