भांगरभूंय | प्रतिनिधी
जोयडा : म्हादय जल विवादाचेर संबंदीत अतिरिक्त अहवाल सादर करपा खातीर न्यायाधिकरणाक आनीक स म्हयन्यांची मुजत वाड दिल्या.
कर्नाटक, गोंय आनी महाराष्ट्र हांचे मदीं म्हादयचें उदक वाटपाचो वाद सोडपा खातीर हें न्यायाधिकरण स्थापन केलां. तांचे कडेन गोंय आनी कर्नाटक सरकारान स्पश्टीकरण अर्ज सादर केल्यात. हाका लागून न्यायाधिकरणान जलशक्ती मंत्रालयाक अतिरिक्त अहवाल सादर करपा खातीर १ वर्साचो काळ वाडोवन दिवपाची मागणी केल्ली. ते प्रमाण मंत्रालयान मंगळारा अधिसुचवणी जारी करून अहवाल सादर करपा खातीर स म्हयन्यांचो वेळ वाडोवन दिला.
म्हादय वाद सोडोवपाक आंतरराज्य न्हंय उदक विवाद कायदो १९५६च्या कलम ४ खाला म्हादय न्यायाधिकरणाची स्थापना केल्या. सर्वोच्च न्यायालयाच्या आदेशा प्रमाण न्यायाधीकरणान ऑगस्ट २०१८ त आपलो अहवाल सादर केल्लो. ह्या अहवाला विशीं २० फेब्रुवारी २०२० दिसा एक आधीसुचवणी जारी केली. अतिरिक्त अहवाल सादर करपा खातीर न्यायाधिकरणाक मुदतवाड दिवपाची ही पांचवी वेळ.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
