भांगरभूंय | प्रतिनिधी
मुख्यमंत्री: खाजगी ऑपरेटर्सांकूय दितले जोडण्यो
पणजी: राज्यांतल्या केबल ऑपरेटर्सांचो विशय मुखेल सचिवांनी मंगळारा बसका घेवन सोडयलो. हाचे मुखार केंद्र सरकाराच्या परिपत्रका प्रमाण ऑपरेटर्सांक केबल्स घालतना सरकारा कडल्यान परवानगी घेवची पडटली. फुडले स म्हयने तांकां केबल्सा विशीं हुस्को नासतलो. उपरांत सरकार भुंयगत केबल्स घालतलें. तातूंत खाजगी ऑपरेटर्सांक जोडण्यो दितले अशें मुख्यमंत्री डॉ. प्रमोद सावंत हांणी बुधवारा पत्रकारां कडेन उलयतना सांगलें.
कसलेंच तरेचें शुल्क भरिनासतना विजेच्या खांब्याक ऑप्टिकल फायबर, टेलिकॉम, इंटरनॅट तशेंच टीव्ही केबल्स जोडिल्ल्या कंपनींचेर वीज खात्यान कांय दिसां पयलीं दंडात्मक कारवाय केल्ली. हो विशय केबल ऑपरेटर्सांनी न्यायालयांत व्हरून कारवायेक स्थगिती दिवपा विशींची याचिका दाखल केल्ली.
पूण न्यायालयान तांची याचिका भायरावन कारवायेक स्थगिती दिवपाक न्हयकार दिलो. उपरांत वीज खात्याचे कार्यकारी अभियंतो काशिनाथ शेट्ये हांणी पणजेंतल्या 43 वीज खांबया वयले बेकायदो केबल कुशीक काडपाची कारवाय मंगळारा केली. तशेंच वीज खात्यान म्हापशें, मडगांव आनी वाठारांतले अशे तरेचे केबल कुशीक काडिल्ले. ताका लागून तिडकल्ल्या केबल ऑपरेटर्सांनी सरकाराचेर चेपण हाडपा खातीर गोंयभरची इंटरनॅट सेवा खंडीत केली. ताचो मोटो फटको आयटी उद्देग तशेंच राज्यांतल्या लोकांक सोंसचो पडलो.
वीज खात्याचे कारवाये विशीं रोखडोच उपाय काडपाची मागणी केबल ऑपरेटर्सांनी मुख्यमंत्री डॉ. प्रमोद सावंत आनी आयटी मंत्री रोहन खंवटे हांचे कडेन केल्ली. उपरांत मंगळारा रातींच काशिनाथ शेट्ये हांचे कडल्यान हें काम काडून घेतलें आनी सरकारान ह्या कामाची जापसालदारकी अधिक्षक अभियंतो शैलेश बुर्ये हांचे कडेन दिल्ली.
बुधवारा सकाळीं केबल ऑपरेटर्सांनी कुशीक काडिल्ले केबल्स परतून जोडपाचें काम सुरू केलें. ताका लागून खूबशा वाठारांत खंडीत जाल्ली इंटरनॅट सेवा सुरळीत जाली.
मजगतीं, हे विशीं पत्रकारांनी विचारिल्ल्या प्रस्नाक जाप दितना मुखेल सचिवांनी मंगळारा रातींच बसका घेवन केबल ऑपरेटर्सांचो विशय सोडयला. हाचे मुखार केंद्र सरकाराच्या परिपत्रका प्रमाण ऑपरेटर्सांनी केबल घालतना सरकारा कडल्यान परवानगी घेवची पडटली. फुडले स म्हयने तांकां केबल्सा विशीं कसलोच हुस्को नासतलो. उपरांत सरकार स्वता भुंयगत केबल्स घालतलें. तातूंत खाजगी ऑपरेटर्सांक जोडण्यो दितले अशें मुख्यमंत्र्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
