भांगरभूंय | प्रतिनिधी
पणजी ः एप्रिल सावन जावपी गरमी सध्या फेब्रुवारींत जाणवपाक लागल्या. हवामानांतल्या बदलाक लागून जायत्या जाणांक भलायकेचे त्रास जातात. हवामान खात्याच्या म्हायती प्रमाण तापमान वाडत आसलें तरी हें उश्णतायेचें ल्हार न्हय. पूण लोकांनी भलायकेची जतनाय घेवची असो सल्लो खात्यान दिला. गोंय सरकारान स्वतंत्र उदका पुरवण खातें करून उदकाचे प्रस्न सोडोवपाचे यत्न सुरू केल्यात.
सध्या उत्तर गोंयच्या कांय वाठारांनी पणजी, पर्वरी, म्हापशें, सत्तरी, पेडणें, फोंडें-धरबांदोड्यां, तशेंच दक्षीण गोंयच्या कांय वाठारांनी वास्को, वेर्णा, मडगांव, सावड्डें- कुडचडें, केपें, काणकोण ह्या वाठारांनी आजूनय उदकाचो उणाव आसा. अशे परिस्थितींत लोकांक उदकाची पुरवण करपा खातीर सरकार नेमके खंयचे उपाय करतले हाचेर चर्चा सुरू आसा.
मजगतीं, म्हत्वाचे म्हणल्यार गोंयांतल्या वेगवेगळ्या सुवातींनी आशिल्ल्या धरणांनी फावो तें प्रमाणांत उदक आसा काय?
मेळिल्ले म्हायती प्रमाण, राज्यांतले कच्चे उदकाचे सांठे आशिल्ल्या धरणांनी 50 ते 75 टक्के भरून आसात. हांतूत बार्देश तालुक्यांक पिवपाच्या उदकाची पुरवण करपी आमठाणे धरणाची उदकाची पातळी सध्या फकत 50 टक्के आसा. तिळारी धरणांतली उदकाची पातळी 99 टक्के आसा. बार्देश, दिवचल, पेडणें तालुक्यांनी पिवपाच्या उदकाची गरज भागोवपा खातीर तिळारीच्या कच्च्या उदकाचो उपेग करतात. गिमाच्या दिसांनी कानलांक आडखळ येना जाल्यार उत्तर गोंयांतल्या उण्यांत उण्या तीन तालुक्यांची गरज भागोवपा खातीर तिळारीचें उदक पुरो जातलें. हाचे भायर गोंय सरकार अंदूं एप्रिल वा मे म्हयन्यांत दिवचलेतल्या साळ हांगा नव्या धरणाचें उक्तावण करपाची तयारी करता. ह्या धरणाक लागून शापोरा न्हंयेचें उदक सांठोवन दवरतले आनी उत्तर गोंयांत कच्च्या उदकाची पुरवण बरीच वाडटली अशी अपेक्षा आसा.
सत्तरी आनी दिवचले तालुक्यांच्या कांय वाठारांनी उदका पुरवण करपी सत्तरींतले अंजुणें धरणांत सध्या 66 टक्के उदकाचो सांठो आसा. मजगतीं, उत्तर गोंयच्या तुळेंत दक्षीण गोंयांत कच्च्या उदकाचो फावो तो सांठो आशिल्ल्याचें दिसता. साळावली धरणांत 78 टक्के उदक आसा. दक्षीण गोंयच्या चडशा वाठारांनी ह्या धरणांतल्यान उदकाची पुरवण जाता. काणकोणांतल्या चापोली धरणांत 74 टक्के उदकाचो सांठो आसा. जाल्यार गावणे धरणांत उदकाची पातळी 74 टक्के आसा. तेच प्रमाण शिरोड्यां आनी भोंवतणच्या वाठारांक उदका पुरवण करपी पंचवाडी धरणांत 61 टक्के उदक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
