भांगरभूंय | प्रतिनिधी
नवी दिल्ली, खबरां संस्था ः केंद्रीय माध्यमीक शिक्षण मंडळान (CBSE) आतां धावी बोर्डाच्या परिक्षे संबंदी नवे धोरण चालीक लावपाचो निर्णय घेतला. ह्या नव्या धोरणा प्रमाण आतां धावेची वर्साक दोन फावटीं (SSC Exam) परिक्षा जातली. हे संबंदी केंद्रीय माध्यमीक शिक्षण मंडळान मसुदो तयार केला. मजगतीं, वर्साक दोन फावटीं बोर्डाची परिक्षा घेवपाचें हें नवें धोरण 2026-27 शिक्षणीक वर्सा सावन लागू जातलें.
केंद्रीय माध्यमीक शिक्षण मंडळाच्या नव्या धोरणा प्रमाण धावीची वर्सांतल्यान दोन फावट परिक्षा जातली. हातूंतली पयली बोर्ड परिक्षा 17 फेब्रुवारी ते 6 मार्च ह्या काळांत जातली. तशेंच दुसरी बोर्ड परिक्षा 5 ते 20 मे मेरेन जातली. पूण आतां नव्या धोरणा प्रमाण 2026 सावन पुरवणी परिक्षेचो पर्याय मेळचो ना. आतां सीबीएसईन ह्या नव्या धोरणाचो मसुदो तयार केला आनी ह्या नव्या मसुद्याकूय निमाणी मान्यताय मेळ्ळ्या.
मजगतीं, धावी बोर्डाच्या परिक्षे संबंदी केंद्रीय माध्यमीक शिक्षण मंडळान तयार केल्ल्या नव्या मसुद्याचेर 9 मार्चा मेरेन प्रतिसाद मागतले. पालक वा विद्यार्थ्यांनी प्रतिसाद दिल्या उपरांत ह्या नव्या धोरणाचेर निमाणो निर्णय जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
