भांगरभूंय | प्रतिनिधी
तिरुअनंतपुरम, खबरां संस्था: केरळच्या तिरुअनंतपुरमांतल्यान एक धक्को दिवपी घडणूक मुखार आयल्या. हांगच्य एका २३ वर्सां पिरायेच्या तरणाट्यान आपली आजी, भाव आनी इश्टीणी सयत वट्ट स जाणांचो खून केल्ल्याची कबुली पुलिसां मुखार दिल्या. हे घडणुकेन वाठारांत बोच बोवाळ जाला. सोमारा सांजेवेळार कांय वरांनीच तीन विंगड विंगड सुवातींचेर ह्यो खुनाच्यो घडणुको घडल्यो. खून केले उपरांत आरोपी अफान हांणी स्वता पुलिसां मुखार आत्मसमर्पण केलें.
आखाती देशांत अफानच्या कुटुंबाचो वेवसाय आशिल्लो. हो वेवसाय बुडिल्ल्या ताचे रिणाचो दोंगर कोसळिल्लो. तातूंत ताका आखाती देश सोडून भारतांत परतुवचें पडिल्लें. मजगतीं, ताचे म्हायतीचेर पुरायेन निंबून रावनासतना पुलिसांनी अदीक चवकशी आनी तपास सुरू केलो. पुलिसांनी अफानचो मोबायल जप्त केल्ल्यान ताचे कॉल डिटेल्स तपासतात. तशेंच ताका ड्रग्साचें वेसन आसा काय ना हेंय तपासतात. अफानान स खून केल्ल्याचो दावो जरी केला तरी तांतलो एक मनीस जिवो आसा आनी ताची गंभीर अवस्था आसा. अफानचे आवयक पुलिसांनी जखमी अवस्थेंत हॉस्पिटलांत दाखल केल्या. तिचेर उपचार सुरू आसात. हाका लागून अफान हांणी वट्ट पांच खून केल्यात अशें समजता.
अफान २४ फेब्रुवारीक सकाळच्या १० वरांचेर आपल्या घरांतल्यान भायर सरलो. घरा पसून २५ किलोमीटर अंतराचेर ताची आजी सलमा बीबी रावताली. आजयेच्या घरा वचून तांणी हातोडेन तिची तकली फोडली. तिचो खून केले उपरांत तांणी हातोडी नितळ केली आनी तो थंयच्यान गेलो. थंयच्यान तो आपल्या काकाच्या घरा गेलो. आजयेच्या घरापसून पाच किमी अंतराचेर ताचो काका लतीफ रावतालो. काका मुखार दिसतांच अफानान बोल्सांतल्यान हातोडी काडली आनी ताची तकलेर मारली. उपरांत काकी सजिदाचे तकलेर हातोडेन बरेच वार केले. त्या दोगांयकूय मरण आयिल्ल्याची खात्री करून आनी हातोडी नितळ करून तो काकाच्या घरांतल्यान भायर सरलो.
आजी आनी काका-काकी उपरांत भाव आनी इश्टीणीचो खून
काका-काकीचो खीन करून अफान स्वताच्या घरा परतलो. घरांत ताची पयली भेट ल्हान भाव एहसान कडेन जाली. तांणी परत बोल्सांतल्यान हातोडी काडली आनी १३ वर्सां पिरायेच्या एहसानचे तकलेर मारली. भावाचो जीव वच मेरेन अफान ताचे तकलेर हातोडेन वार करपाक लागलो. उपरांत घराचे पयले माळयेर वचून तांणी आपले आवयची तकली फोडली. कांय वार केले उपरांत ताका आपले आवयकूय मरण आयलां अशें दिसलें. उपरांत तो सकयल आयलो. तांणी आपली इश्टीण फरशाना हिका आपोवन घेतली. फरशाना शेजारच्याच घरांत रावताली. फरशाना घरी आयले उपरांत तो तिका एके कुडींत घेवन गेलो. उपरांत अफानान हातोडेन फरशानाची तकली फोडली. तिचेर कांय वार करून तिका मारून उडयली.
अफानचो आत्महत्येचो यत्न
फरशानाक मारून उडयले उपरांत अफान कांय वेळान घरांतल्यान भायर सरलो. तांणी सरळ पुलीस स्टेशनांत वचून आत्मसमर्पण केलें. पुलिसांनी आपणें केल्ल्या खुनांची म्हायती दिले उपरांत तांणी हुंदीर मारपाचें वखद पिवन आत्महत्या करपाचो यत्न केलो. मात, पुलिसांनी ताका बेगोबेग हॉस्पिटलांत व्हेलो. ताचेर सध्या उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
