भांगरभूंय | प्रतिनिधी
रेंट अ कॅब असोसिएशनान येरादारी उपसंचालकाक सादर केलें निवेदन
पणजी ः विमानतळार ‘रेंट अ कॅब’ सेवा दिवची न्हय असो येरादारी खात्यान जारी केल्लो आदेश हे येवजणेच्या मुळाव्या नेमा आड आसा. 2019 वर्साच्या आदेशा प्रमाण ‘रेंट अ कॅब’ राज्यांत खंयचेय सुवातेर सेवा दिवंक शकता. पूण ह्या नव्या नेमा प्रमाण ‘रेंट अ कॅब’ वेवसायिकांक लुकसाण जातलें आनी हो नवो आदेश फाटीं घेवचो अशी मागणी संघटणेचे उपाध्यक्ष नितेश चोडणकार हांणी केल्या.
मंगळारा संघटनेच्या पदाधिकाऱ्यांनी येरादारी खात्याच्या उपसंचालकाक भेट दिवन हे संबंदी निवेदन सादर केलें. मोपा विमानतळावेल्या कांय वेंचून काडिल्ल्या टॅक्सीकारांचे आयकून येरादारी खात्यान हो निर्णय घेतिल्ल्याची शक्यताय आसा अशें चोडणकार हांणी सांगलें. निर्णय घेवचे पयलीं आमचे संघटने कडेन उलोवंक जाय आशिल्ले. आमची बाजू सादर करपाक आमकां उण्यांत उणो म्हयनो दिवपाची गरज आशिल्ली. हो आदेश काडचें पयलीं मोपा विमानतळार ‘रेंट अ कॅब’ हो वेवसाय कायदेशीर पद्दतीन चलतालो. आमी थंयसरले पार्किंग शुल्क भरताले. पूण चार टॅक्सीकारांच्यो कागाळी आयले उपरांत आमचेर थंय बंदी घाली अशें तांणी सांगलें.
चोडणकारान म्हणलें, टॅक्सीकार विरुद्ध ‘रेंट अ कॅब’ असो संघर्श करचो न्हय. पूण मोपाचे हे चार टॅक्सीकार प्रस्न उपस्थित करतात. आमच्या संस्थेच्या एका वांगड्यान विमानतळा कडेन कबलात केल्या. ते प्रमाण ताका त्या वाठारांत ‘रेंट अ कॅब’ वेवसाय चलोवंक मेळटा. म्हणटकच नव्या आदेशाक लागून कायदेशीर प्रस्न उप्रासपाची शक्यताय आसा. सरकार आमकां विचारले बगर नवे नेम घालत रावता. आमी ताका केन्नाच विरोध केलो ना. पूण विमानतळार ‘रेंट अ कॅब’ दिवचो न्हय असो नेम आमच्या वेवसायाचेर परिणाम करपाचो आसा.
दादागिरी भास वापरूं नाकात: चोडणकार
मोपा विमानतळार कांय टॅक्सीकार दादागिरी करतात. सध्या ते स्वता विमानतळ चलयिल्ले सारके वागतात. ते टॅक्सी संघटनेचे वांगडी आसल्यार तांच्या संघटनेन आमच्या संघटने कडेन उलोवणी करचीं. दादागिरी करपी भास वापरून कायदो आनी सुवेवस्थेचे प्रस्न निर्माण करचे न्हय अशें चोडणकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
