भांगरभूंय | प्रतिनिधी
भोवमानेस्त रेखाताई,
नमस्कार,
देसाच्या राजपाटणाचें, दिल्लीचें मुख्यमंत्रीपद मेळयिल्ले खातीर खूब खूब बधाई. राजकारणांत येवंक सोदपी अस्तुरेची तुमी उमेद. वेंचून आयिल्ली, रामलीला मैदानाचेर मुख्यमंत्रीपदाचो सोपूत घेवचे आदींच सोपूतविधी सुवाळ्याक येवकार दिवपी, उपरांत नमळायेन हाजीर आशिल्ल्यांक नमस्कार करपी, तेच दिसा यमुना न्हंयेची आरती करपी, मुख्यमंत्र्यांच्या कदेलार बशिल्ली रेखाताई… कितलीं तुमचीं रुपां?
कोणेय कितलोय बोवाळ घालो, आडावपाचे येत्न जाले तरी जापो दिवपाकच जाय अशें ना, भिवपाची गरज ना. तुमचो वावर, दवरील्ली नितळसाणीची मोख हीच तुमच्या कर्तृवाची गवाय जावची ही आस्त समेस्त अस्तुरेक आसा. तुमी संघ परिवारांतल्यो अशें मुखामळार दिसलेंना. तुमची भारतीय साडी ही देसाच्या नारीशक्तीची वळख मुखेल करुन सुवाळ्या तेंपार. मुख्यमंत्रीपद मेळ्ळें तरी समेस्तांक विसरुंक ना हें तुमचो नमस्कार उलोवन गेलो.
रेखाताई, आमकां गोंयकारांक एक मुख्यमंत्री शशिकलाताई काकोडकार मेळिल्ल्यो. गोंयच्या पयल्या मुख्यमंत्र्यांची ती धूव. एक विचारवंत, उंचेलें शिक्षण घेतिल्ल्यो. बऱ्यो प्रशासक म्हणून आयजय यादींतल्यो. तुमकां कायद्याचें शिक्षणय आसा, शशिकलाताईंवरी तुमींय कर्तृत्ववान जातल्यो अशें म्हाका दिसता. गोंयच्या राजकी मळा वयल्या सगल्यांक खोस जाली तुमकां मुख्यमंत्रीपद फावो जालें म्हणून.
बोवाळ घालून तिडक हाडपी आतिशीताईंक विरोधी पक्ष मुखेलीपद आम आदमी पार्टेच्या विधिमंडळ गटान दिलां, तें समा व्हय? विधिमंडळ गटाचें मुखेलीपद तांकां मेळ्ळें, अजूनय त्यो मुखेलमंत्रीच आशिल्लेवरी वावुरतात. तांकां कायदो समजावन सांगात, कायद्याचेर, विधिमंडळ नेमावळीचेर बोट दवरुन वावरप कशें तें तुमकां तांकां शिकोवचें पडटलें. 10 ते 15 वर्सां तुमीं मुख्यमंत्रीपदार उरचीं अशें हांव देवा लागीं मागतां. नेटान जावचो तुमच्या कामकाजाक आरंब, झांशीचे राणयेवरी. दिल्लींत जाय समेस्तांक सवस्तकाय, धुवांक राखण, नो अॅक्सीडेंटस, नितळसाण. थंयच लक्ष्मी येतली हें याद दवरात. अदीं मदीं मेळूया पत्रांतल्यान.
देव बरें करुं
सुहासिनी प्रभुगांवकार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
