गोंय अँटीबायोटीक्स कंपनीच्या कामगारांक पगार ना
भांगरभूंय | प्रतिनिधी
120 कामगारांचें आंदोलन सुरु, पगार आनी बडटी दिवपाची मागणी
पेडणें ः तुयेंतल्या गोंय अँटीबायोटीक्स लि. हे वखदां कंपनींतल्या कामगारांक दोन म्हयने पगार मेळूंक ना. तशेंच 10 वर्सां काम करून लेगीत तांकां बडटी दिवंक ना. हाका लागून कामगारांनी आंदोलनाक सुरवात केल्या.
वट्ट 120 कामगार आंदोलनांत वांटेकार जाल्यात. सुरवेक कांय कामगार गेटी भितर गेल्ल्यान तांकां आडायले. कांय कामगार उसरां पाविल्ल्यान तांकां गेटी भायर दवरले. हाका लागून कामगारांनी तिडक उक्तायली.
जो मेरेन आमची मागणी पुराय जायना तो मेरेन आंदोलन चालूच दवरतले अशी शिटकावणी कामगारांनी दिली. आंदोलनाची गंभीरतायेन दखल घेवन थळावे गोवा फॉरवर्ड पक्षाचे फुडारी दीपक कळंगुटकार हांणी कामगार आनी अधिकाऱ्यां कडेन मेळून चर्चा केली. उपरांत कळंगुटकार हांणी थळाव्या पत्रकारां कडेन उलयतना सांगलें, कंपनीचे वरिश्ठ अधिकारी ह्या कामगारांक कसलीच किंमत दिनात आनी तशेंच तांच्या पगारा विशीं अस्पश्ट जाप दितात. समाधानकारक जाप मेळूंक नाशिल्ल्यान वरिश्ठ अधिकाऱ्यांनी हो प्रकार गंभीरतायेन घेवन कामगारांक वेळार पगार दिवचो. नाजाल्यार आमी रस्त्यार देंवतले आनी हे विशीं विधानसभेंतूय आवाज काडटले अशें तांणी सांगलें. ताचे आदीं सरकारान कंपनीच्या वरिश्ठ अधिकाऱ्यांक शिटकावणी दिवन कामगारांचे पगार वेळार दिवचे अशी खर मागणी केली.
ह्या वेळार कामगारांनी सांगलें, कंपनीन वेळार पगार दिवचो आनी पात्र कामगारांक बडटी दिवची अशी मागणी परत परत करतात. कामगार संघटनेच्या फुडाऱ्यांनी कंपनीच्या अधिकाऱ्यां कडेन जायत्या वेळार हे विशीं चर्चा केली. मागण्यो मांडल्यो. पूण आयज मेरेन त्यो पुराय जावंक ना. कंपनी प्रशासनान आडनदर केल्ल्यान निमाणे कामगारांक आंदोलनाचो मार्ग आपणावचो पडलो. बेगोबेग योग्य निर्णय घेवपाचें आवाहन कामगार संघटनांनी प्रशासनाक केल्लें. पूण अजून कोण कानामनार घेनात. देखून सोमारा सकाळीं सावन आंदोलनाक सुरवात जाल्या.
पेडणें तालुक्याचे 150 परस चड कामगार हे कंपनींत दोन शिफ्टींनी काम करतात. कांय कामगार निवृत्त जावपाचें आसात. दोन – दोन म्हयने पगार मेळना जाल्यार घर कशें चलोवपाचें? अशी खंत कामगारांनी उक्तायली.
अर्दो पगार दिवपाक कंपनी तयार आसा. पूण आमी रीण घेतलां. तो अर्दो पगार बँक खात्यांत जमा जाता तेन्ना आमकां कितेंय घेवपाक जाय जाल्यार पयशे कशे पावतले? देखून कंपनीन आमचो पुराय पगार वेळार दिवचो, अशी खर मागणी कामगारांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
