भांगरभूंय | प्रतिनिधी
ब्रॉडबॅण्ड केबल तोडपाचे कारवायेक अंतरीम स्थगिती दिवपाक उच्च न्यायालयाचो न्हयकार
भांगरभूंय | प्रतिनिधी
पणजी : वीज खांब्यांक बांदिल्ले ब्रॉडबॅण्ड केबल तोडपाचे कारवायेक अंतरीम स्थगिती दिवपाक उच्च न्यायालयान न्हयकार दिल्ल्यान केबल ऑपरेटर्सां मुखार संकश्ट आनीक खर जालां. ब्रॉडबॅण्ड केबल ऑपरेटर्सांनी दाखल केल्ले याचिकेचेर सुनावणी आतां 18 मार्चाक सुनावणी जातली. शुल्काची थकबाकी भरूंक नाशिल्ल्यान केबल तोडपाची कारवाय सुरू करतले, अशें कार्यकारी अभियंते काशिनाथ शेट्ये हांणी स्पश्ट केलें.
टेलिवीजन तशेंच इंटरनॅट सेवा दिवपा खातीर विजेच्या खांब्यांचो वापर करतात. विजेच्या खांब्यांक केबल बांदून सेवा दितात. हाका लागून वीज खातें शुल्क घेतात. फाटलीं पांच वर्सां शुल्क भरूंक नाशिल्ल्यान वीज खात्यान केबल तोडपाची कारवाय सुरू केल्ली. हाचे आड फाटल्या म्हयन्यांत वीज खात्यान कारवाय सुरू केली तेन्ना केबल ऑपरेटर्स संघटणेन उच्च न्यायालयांत याचिका दाखल केली. केबल ऑपरेटर्सांनी उच्च न्यायालयांत केबल तोडपाची कारवाय फुडें धुकलपाची मागणी केली. ही मागणी उच्च न्यायालयान मान्य करपाक न्हयकार दिला. याचिकेचेर फुडली सुनावणी 18 मार्चाक जातली.
मदल्या काळांत वीज खात्यान केबल ऑपरेटर्सांक शुल्का सयत दंड भरपाच्यो नोटिसो धाडिल्ल्यो. ह्या नोटिसांक केबल ऑपरेटर्सनी कसलोच प्रतिसाद दिवंक ना. हाका लागून वीज खातें खांब्या वयले केबल तोडपाची कारवाय सुरू करतले, अशें वीज खात्याचे कार्यकारी अभियंते काशिनाथ शेट्ये हांणी सांगलें.
केबल तोडल्यार राज्यांतले इंटरनॅट सेवेचेर परिणाम जातलो. हो विशय न्यायप्रविश्ट आसा. शुल्क भरपा वांगडा सगळ्यो अटी पाळपाची आमची तयारी आसा. वीज खात्यान शुल्क भरपाक मात्सो वेळ दिवचो, अशी मागणी अ. गो. इंटरनॅट सेवा पुरवठादार संघटनेचे अध्यक्ष मॉविन ब्रिटो हांणी केली. गोयांत केबल टीवीचे देड लाख गिरायकां आसात. तशेंच केबला वरवीं 50 हजार गिरायकांक इंटरनॅट सेवेची पुरवण करतात. केबल तोडल्यार इंटरनॅट सेवेचेर परिणाम जावपाचो भंय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
