भांगरभूंय | प्रतिनिधी
मांडवी पुला उपरांत, कालापूर म्हामार्गाच्या कामाक लागून कोंयडी
भांगरभूंय । प्रतिनिधी
पणजीः उत्तर गोंया सावन दक्षीण गोंयांत वचपी लोकांचें आनीक पासियेंस पेड्ड्यार जावपाचें आसा. पोरणो मांडवी पूल बंद आसा, ताका लागून येरादारीचे बारा बिरेस्तार आनी तेरा शुक्रार जाल्यात. तातूंत भर म्हणून कालापूर – बांबोळी म्हामार्गाची एक लेन बंद करून सांकवाचें काम हातांत घेतलां, जाल्यार दुसरे लेनीचेर दोनूय वटांतले येरदारीक लागून कोंयडी जाता. ह्या कामांक लागून लोकांक देड म्हयने तरी त्रास काडचे पडटले.
कालापूरा एस्ट्रेला हॉला लागसार पणजे सावन बांबोळे वचपी म्हामार्गाचेर सांकव बांदपा खातीर खणपाचें काम हातांत घेतलां. ताका लागून उजवे वटेनची लेन बंद करून दावे वटेनचे लेनींतल्यान दोनूय वटेन उत्तर गोंय तशेंच दक्षीण गोंयांतल्यान येवपी येरादारी यो-वच करतात. अचकीत काम हातांत घेतिल्ल्यन थंय येरादारीचो गोंदळ जावन गाडयांच्यो रांको लागिल्ल्यो.
उत्तर गोंयच्या पेडणें, म्हापशें सावन दक्षीण गोंयच्या मडगांव-वास्को वचपी लोकां खातीर पासियेंस पेड्ड्यार करपी अणभव येतलो. पयलीं पर्वरे उड्डाण पुलाच्या कामांक लागून आडकून उरतात, उपरांत पोरणो पूल बंद आशिल्ल्यान नव्या पुलाचेर आडकून उरतात आनी मागीर कालापूर म्हामारगाची एक लेन बंद आशिल्ल्यान परत आडकून उरतात. राजधानींत यो-वच करप दोनूय वटांनी कटकटीचें जालां. हे विशीं उलयतना थळावे आमदार रुडोल्फ फर्नांडीस हांणी सांगलें, म्हामार्गाच्या कामा वेळार नियोजन सारकें जांवक नाशिल्लें. हे खातीर हीं कामां आतां परतून करचीं पडटात. जेन्ना म्हामार्गाचें काम हातांत घेतात तेन्ना कोमुनिदाद, पंचायत आनी शेतकारांक विस्वासांत घेवप गरजेचें आसता. पूण तशें जांवक नाशिल्ल्यान ह्या रस्त्यार आशिल्ले पयलीचे कान मोडले आनी त्या जाग्यार व्हडलीं पायपां घातलीं, पूण तीं पायपां व्हाळांक जोडची सोडून भायर सोडिल्ल्यान मेरशें, बांबोळे, चिंबला सावन पावसाचे उदक जें दोंगरा वयल्यान देंवतालें तें हीं पायपां चोंदिल्ल्यान आडावन उरतालें. ताका लागून हें उदक कुसून घाणी मारपाक लागल्या आनी शेजाराक आशिल्ल्यो कांदळी लेगीत सुकल्यात, अशें रुडोल्फ हांणी सांगलें.
काम सोंपपाक देड म्हयनो लागतलो : रुडाल्फ
हो विशय मुख्यमंत्री डॉ. प्रमोद सावंत हांचे मुखार विधानसभेंत मांडिल्लो. आतां हीं पायपां काडून आमी सांकव बांदतात. हो सांकव बांदले उपरांत उदक आडावचें ना, तें दर्यांत वचून मेळटलें. एके लेनीचेर काम आमी सध्या सुरू केलां आनी हें काम म्हयन्या भितर पुराय जातलें. तें जाले उपरांत ही लेन उक्ती करून दुसरे लेनीचेर हें काम हातांत घेतले. ह्या सांकवाचें काम पुराय जाता म्हणसर देड म्हयनो तरी वतलो, अशें आमदार रुडोल्फ फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
