भांगरभूंय | प्रतिनिधी
भांगरभूंय । प्रतिनिधी
पणजी : फाटले कांय दीस गोंयांतलें तापमान वाडत आसा. फेब्रुवारींत मे म्हयन्या भशेन उबाळ जाणवता. सोमारा पणजेचें चडांत चड तापमान वाडून 37.4 अंश सेल्सियस जाल्लें. हें फाटल्या 55 वर्सांतलें फेब्रुवारींतलें पांचवें सगळ्यांत चड तापमान आशिल्लें. हे आदीं फेब्रुवारी 2009 त पणजेचें सगळ्यांत चड 39.2 अंश सेल्सियस तापमानाची नोंद जाल्ली. जाल्यार 29 फेब्रुवारी 1984 त 39 अंश सेल्सियस तापमान नोंद जाल्लें. सोमारा मुरगांवचें चडांत चड तापमान 33.4 अंश सेल्सियस आशिल्लें.
सोमारा गोंयांतल्या भोवतेक वाठारांनी सकाळच्या 11 वरां सावनूच वताचो रखरख जाणवतालो. दनपारां उपरांत घरा भायर सरप नाका कशें दिसतालें. हवामान खात्याच्या आपचलीत केंद्राचे नोंदी प्रमाण साळगांवां 39.4 अंश, पेडण्यां 38.6 अंश जाल्यार मोपा 39 अंश सेल्सियस चडांत चड तापमानाची नोंद जाली. साळगांवां 22.1 अंश, म्हापश्यां 22.3 अंश जाल्यार मोपा 22.5 अंश सेल्सियस उण्यांत उण्या तापमानाची नोंद जाल्ली.
सोमारा पणजे उण्यांत उणें तापमान 23 अंश सेल्सियस आसलें. मुरगांवचें उण्यांत उणें तापमान 23.5 अंश सेल्सियस आशिल्लें. खात्यान फुडले स दीस गोंयांतलें उण्यांत उणें तापमान 24 ते 25 अंश सेल्सियस मेरेन आसपाची शक्यताय उक्तायल्या. चडांत चड आनी उण्यांत उणें तापमान अदीक आसपाची शक्यताय आशिल्ल्यान फुडलें सप्तकभर लोकांक वताचो रखरख सोंसचो पडटलो. तातूंत दमट हवामानाक लागून उबाळ वाडपाची शक्यताय आसा.
पारो 37 अंशा मेरेन पावपाची शक्यताय
हवामान खात्यान फुडले सात दीस गोंयांत दमट वातावरण आसपाची शक्यताय उक्तायल्या. हे मजगतीं, चडांत चड तापमान 35 ते 37 अंश सेल्सियस मेरेन आसपाची शक्यताय उक्तायल्या. हे खातीर उबाळा पासून कांय दीस स्वताची जतनाय घेवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
