भांगरभूंय | प्रतिनिधी
पणजी : राज्यांत सध्या बरीच गरमी जावपाक लागल्या. वातावरण बदल्ल्यान जोर, थंडी, अशक्तपणां, उश्णतायेचो त्रास जाणवपाक लागला. हरशीं मार्च लागले उपरांत जाणवपी वत फेब्रुवारींतूच गोंयकारांक नाकापुरो करपाक लागलां. एसी, कूलर, फॅन घेवपा खातीर लोक बाजारांनी वळटात.
मजगतीं, एके आंकडेवारी प्रमाण, दरवर्सा राज्यांत विजेच्या वापरांत १० टक्के ह्या हिशेबान वाड जाल्ल्यान हाचो वीज खात्याच्या कामाचेरूय परिणाम दिसता.
विजेची वाडपी मागणी, पुरवण आव्हानात्मक थारता. हाका लागून विवीध भागांत परत परत लायट वचपाच्यो कागाळीय वाडल्यात. गोंयच्या वीज खात्या कडेन वीज तयार करपाक लागपी स्वताचीं अशीं यंत्रणां ना. गिरायकांची मागणी पुराय करपा खातीर वीज खरेदी करतात. हाचें जायतें लुकसाणूय राज्याक सोंसचें पडटा.
फाटल्या वर्सा विजेची एकंदर मागणी ८५० मेगा वॉट इतकी आशिल्ली. मजगतीं, सध्याचो वताचो वाडपी पारो पळयल्यार येवपी काळांत विजेची मागणी आजून १० टक्क्यांनी वाडटली. तरी, सौरऊर्जेच्या वापरा खातीर राज्य सरकाराच्या यत्नांक लागून वीज विभागाचेर भार उणो जावपाची अपेक्षा आसा. हालींच कांय शारांनी कांय रस्त्यांचेर चार दिव्यांचें खाबें घाल्यात. ताचोय परिणाम वीज पुरवणेचेर जातलो.
सध्या उत्तर आनी दक्षीण गोंयांत जायत्या सुवातांचेर उदकाचो उणाव जाणवल्ल्याच्यो कागाळीय मुखार येतात. जायते जाण सोशल मिडियाचेर हे विशींची म्हायती शेअर करतात. मजगतीं पणजी स्मार्ट सिटीच्या कामाक लागून, जायत्या सुवातांचेर खणपाचें काम करतात. फाटल्या कांय दिसांनी कंत्राटदार आनी कामगारांच्या नजरचुकीन पिवपाच्या उदकाचीं पायपांय फुटल्यांत. हाचो परिमाण पणजे आशिल्ल्या विवीध वसणुको आनी घरांक जाणवतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
