ती इश्टीणी सयत दुचाकीर बसून वताली, इतल्यांत….
भांगरभूंय | प्रतिनिधी
पणजी : गोंयांत सध्या सोशल मिडियावेल्या एका पोस्टाचेर बरीच चर्चा चल्ल्या. सोशल मिडियाचेर एके बायलेन पोस्ट घालून दिल्ले म्हायती प्रमाण, ‘दुचाकी वेल्यान आपले इश्टीणी सयत आदल्या पाटो ब्रिजा वयल्यान वतना एक दुचाकी चालक आपली गाडी तांचे कुशीक चलोवपाक लागलो. ‘एक्सक्यूज मी’ म्हणीत ताणें तो पुलीस आशिल्ल्याचें सांगलें. ह्या वेळार तो एका हातान गाडी चलयतालो आनी दुसऱ्या हातान विचित्र कृत्य करतालो. ताणें तिचेर एक अश्लील कमेंटूय मारलो. हें सगळें पळोवन भियेल्ली ते बायलेन आनी तिचे इश्टीणीन प्रसंग वळखून थंयच्यान स्कूटर दुसरे वटेन वळोवन त्या मनशा पसून सुटका करून घेतली. ही घडणूक काल रातच्या सुमार १०.३० वरांचेर घडली.
मजगतीं, ते बायलेन आपल्या वांगडा जाल्लो हो प्रकार सोशल मिडियाचेर घालो. ‘अशे स्थितींत कितें करचें? आड्डुचें? किंळच्यो मारच्यो? ताका तोंड दिवचें? काय वाट बदलून थंयच्यान पयस वच्चें? मनांत भंय निर्माण जाल्ल्यान, त्या खिणाक म्हाका थंयच्यान पयस वचप होच योग्य पर्याय दिसलो.’ अशेंय तिणें पोस्टा वरवीं म्हणलां. तशेंच, ‘अशे तरेचें वायट कृत्य करपाचे विचार लेगीत मनशाच्या मनांत कशे येतात?’ असोय प्रस्न तिणें उक्तायला.
ह्या पोस्टान उत्तर गोंय पुलीस अधीक्षक अक्षत कौशल हांचें लक्ष ओडून घेतलें. पिडेस्त बायलेच्या आपूण प्रत्यक्ष संपर्कांत आसां. ह्या घडिल्ल्या प्रकारा विशीं आपणें म्हायती घेतल्या. दुबाविताची वळख पटपा खातीर पणजी पुलिसांचे जायते पंगड तयार केल्यात, अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
