भांगरभूंय | प्रतिनिधी
ग्रामसभेंत लोकांची उपोशणाची शिटकावणी
भांगरभूंय । प्रतिनिधी
कोरगांव : गांवांत जायते मेगा प्रॉजेक्ट्स येतात. तांकां वाट करून दिवपा खातीर दोंगर कांपणी नेटान चालू आसा. हाका लागून सैमीक झरी शेणल्यात. झाडां, झिली मारिल्ल्यान गांवाचो सैम काबार जाला. सगले कडेन रखरख दिसता. हाचेरूय गांवच्या लोकांनी पंचायतीचें लक्ष ओडलें. व्हड इमारती, प्रॉजेक्ट हांकां गांवांत सुवात नाकाच. नगर नियोजन खातें तांकां परवानगी दिता जाल्यार हाचो आमी खर निशेध करतात. हाचेर कारवाय करूंक ना जाल्यार उपोशणाचो मार्ग आपणायतले, अशीय शिटकावणी कोरगांवचे ग्रामसभेंत गांवच्या लोकांनी दिली.
कोरगांव पंचायतीची ग्रामसभा सरपंच अब्दुल करीम नायक हांचे अध्यक्षते खाला आयतारा 23 फेब्रुवारीक श्री कमलेश्वर पंचायत सभाघरांत जाली. ह्या वेळार माचयेर उपसरपंच दिवाकर जाधव, पंच तशेंच आदली सरपंच अनुराधा कोरगांवकार, पंच नीता नरसे, पंच कल्पिता कलशांवकार, पंच देविदास नागवेकार, पंच उमेश च्यारी, पंच लौकक शेट्ये, पंचायत सचीव श्रद्धा कोरगांवकार, गट विकास कार्यालयाचे निरिक्षक तिळवे उपस्थित आशील्ले.
ह्या वेळार सरपंच अब्दुल नायक हांणी सांगलें, बेकायदेशीर गजालींक कोणे परवाने दिल्यात जाल्यार ते रद्द करून फकत थळाव्या लोकांच्या बर्याचें आनी कायदेशीर आशिल्लेच प्रकल्प हाडटले, अशी हमी दिली.
पंचायतीचे सचीव योग्य आदार दिना, अशें लोकांनी पंचायत मंडळाचे नदरेक हाडून दिलें. फाटल्या कांय काळांत दोन हजारां परस चड झाडांची कत्तल जाल्या. दोंगर कापणेकूय परवानगी दिल्या. ह्या प्रकल्पांक पंचायतीच्या सचिवाचों पुराय आदार मेळ्ळा, असो गंभीर आरोप ह्या वेळार नरेश कोरगांवकार आनी हेर लोकांनी ग्रामसभेंत केलो. तशेंच तांचे बदलेची खर मागणी केली.
कोरगांव ग्रामसभेंत कोयराचो मुद्दो बरोच तापलो. गांवांत वता थंय कोयर उडोवन बुरशेपणां करप्यांचेर पंचायतीन दंडात्मक कारवाय करची, अशी मागणी लोक्नी केली. तशेंच हाका लागून गांवांतल्या पर्यावरणाचो जावपी विध्वंस आडावपा खातीर पंचायतीन योग्य पावलां उखलचीं, अशी मागणीय केली.
मजगतीं, गांवांत सध्या सुरू आशिल्ल्या आनी प्रस्तावीत आशिल्ल्या जायत्या उदरगतीच्या कामांचेर चर्चा जाली. कोरगांव ते पेडणें रस्तो फोंडकुलांनी भरला. संबंदीत अधिकारी तशेंच आमदारांचीय हाचे कडेन आडनदर जाता. थळाव्यांक हाचो व्हड मार बसता. हाचेर उपाय काडप गरजेचें आसा, असोय एक मुद्दो लोकांनी उपस्थीत केलो.
बेगिनूच हाचेर उपाय काडटले, अशी हमी सरपंच अब्दुल नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
