तेमवाडो दर्यादेगेर जावपी पार्किंग प्रकल्प नाकाच
भांगरभूंय | प्रतिनिधी
मोरजेकारांची एकमुखान मागणी
पेडणें : मोरजी ग्रामसभेंत तेमवाडो दर्यादेग वाठारांत पर्यटन खात्या वतीन आठ कोटी रुपयां खर्च करून पार्कींग भोवउद्देशी प्रकल्प उबारतले. त्या प्रकल्पाक आमचो खर विरोध आसा. पार्कींग वेवस्थेक लागून हांगां आनीक समस्या निर्माण जातल्यो. पार्कींग प्रकल्पा मेरेन वचपाक २५ मिटर रुंदायेचो रस्तो लागतलो. हाका लागून रस्त्या कुशीक आशिल्ल्या घराचेर बुलडोझर चलोवन तीं मातये भरवण करपाची शक्यताय आसा. तशेंच पार्कींग प्रकल्प वाठारांत बिगर गोंयकारांनी व्हड प्रमाणांत जमनी विकत्यो घेतल्या. ते जमनींत व्हड व्हड प्रकल्प आयल्यात. देखून आनीक २५ मिटरांचो रस्तो जमीन वेवसायिकांच्या हिता खातीर वचपाक शकता. ताका लागून ह्या प्रकल्पाक आमचो खर विरोध आशिल्ल्यान पंचायतीनूय ताका विरोध करचो, अशी नेटान मागणी जागृत नागरीक कॅप्टन जेराड डिसोझा, अल्बर्ट फर्नांडीस, मयूर शेटगांवकार हांणी केल्या. तशे तरेचो थाराव ग्रामसभेंत मंजूर जालो.
मोरजी ग्रामसभा सरपंच पवन मोरजे हांचे अध्यक्षते खाला आयज पंचायत सभाघरांत जाली. ह्या वेळार उपसरपंच सुप्रिया पोके आनी विलास मोरजे, फटू शेटगांवकार, स्वप्नील शेटगांवकार, मुकेश गडेकार, रजनी शिरोडकार, मंदार पोके हे पंच आनी कांय थळावे गांवकार हाजीर आशिल्ले.
पार्कींग प्रकल्प कोणाक विस्वासांत घेवन उबारतात? कोणाच्या हिता खातीर? सी आर झेड पर्यावरण विभाग हांची परवाने घेतल्या? एक चिरो पसून लावपाक सीआरझेड विभागाचो परवानो घेवचो पडटा. हाची म्हायती पर्यटन खात्याक ना काय? वा पंचायत हाचे कडेन आडनदर करून अशा प्रकल्पांक उर्बा दिता काय? असो प्रस्न कॅप्टन डिसोझा हांणी केलो.
सरकारीान पार्कींग प्रकल्प उबारल्यार तो कायदेशीर मार्गान बंद उडोवपाची शिटकावणी मयूर शेटगांवकार हांणी दिली.
एकूच लेखी अर्ज
हे ग्रामसभेक लोकांचो व्हडलो प्रतिसाद मेळूंक ना. तुकाराम शेटगांवकार हांचो एकूच लेखी स्वरूपाचो अर्ज ग्रामसभे मुखार आयलो. तांणी हे ग्रामसभेंत जे बोगस कागाळी करतात. तांचे कडल्यान पंचायत आधार कार्ड, निदान ताची फोटो कॉपी घेता काय ना? वा अर्जदाराची बनावट सय, बनावट क्रमांक घेवन कागाळी स्वीकारतात? अशे प्रस्न केले. ताचेर जाप दितना ह्यान फुडें जो कोण बांधकामा विशीं वा हेर कागाळी दितलो तांचें आधार कार्ड, वळखपत्र स्वीकारतले अशें सरपंच पवन मोरजे हांणी सांगलें.
मोरजी पंचायत वाठारांत कितलीं दुकानां आनी हॉटेलां आसात? तांचे कडल्यान सरकाराक कितलो महसूल मेळटा? कितल्या जाणां कडेन सगळे तरेचे परवाने आसात? रस्त्या कुशीक अतिक्रमण करून रस्ते अशीर करतात. कोयर समितीची कितल्या म्हयन्यांनी बसका जाता? जमा खर्च, हिशब केन्ना सादर करतात? अशे प्रस्न तुकाराम शेटगांवकार हांणी विचारले.
मोरजी पंचायत ग्रामस्थां वतीन वेवसायीकां कडल्यान विवीध तरेचे कर, येणावळ जमा करतात. तो संगणका वरवीं ऑनलायन पद्धतीन केन्ना उपलब्ध जातलो? असो प्रस्न शेटगांवकार हांणी हजर केलो तेन्ना सरपंच पवन मोरजे हांणी, सगळे तरेचो हिशेब संगणका वरवीं आनी ऑनलायन पद्धतीन करपाचो यत्न आसतलो अशें सांगलें.
कला भवन उबारचें
मोरजी पंचायत वाठार पर्यटन नदरेन म्हत्वाचो. गांवचो इतिहास, संस्कृती, परंपरीक वेवसाय हाचें दर्शन जे देशी विदेशी पर्यटक मोरजे गांवात येतात तांकां जावपाक जाय. देव, देवस्थानांची म्हायती, साहित्यीक, लेखक कलाकारांचें कार्य, तांची म्हायती, तांचीं शिल्पां, तांचीं पुस्तकां, तांणी तयार केल्लें साहित्य, वास्तू पर्यटकां खातीर प्रदर्शन आनी विक्रे खातीर उपलब्ध आसपाक जाय. ताका लागून आयज मेरेन मोरजी पंचायतीन कला भवनाची निर्मिती कित्याक करूंक ना? बाल भवन केंद्र कित्याक हाडूंक ना? असो प्रस्न सोनू शेटगांवकार हांणी केलो.
मोपा आंतरराष्ट्रीय विमानतळारूय कलाकारांच्या कलेक मान ना. थंय कला भवनाचो एकूय स्टॉल ना. तशेंच मोरजे खींड वाठारांत पर्यटन खात्या खाला उबारिल्ल्या पर्यटन प्रकल्पांत कलाकारांचें स्टॉल ना. पंचायतीन हे खातीर कसले यत्न केल्यात? असो प्रस्न करून, निदान मोरजे गांवांत बंद आशिल्ल्या मुळाव्या शाळांच्यो सुवातो पंचायतीन ताब्यांत घेवन त्या सुवातांचेर कलाकारां खातीर कला भवन उबारचें अशी मागणी तांणी केली.
कोयराची समस्या गंभीर
मोरजे दर्यादेग वाठारांत कोयराची समस्या गंभीर आसा. कोयर सद्दां उखलप जायना. तो पंचायतीन उबारचो. हे खातीर ग्रामस्थांची मजत घेवची अशी सुचवणी दीपक शेटगांवकार, गोविंद पोके हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
