भांगरभूंय | प्रतिनिधी
कराची, खबरां संस्था: पाकिस्तानच्या कराचींतल्या दाऊद अभियांत्रिकी आनी तंत्रज्ञान विद्यापीठांत होळी खेळिल्ले खातीर हिंदू आनी मुस्लीम विद्यार्थ्यां आड गुन्यांव दाखल केलो. २१ फेब्रुवारीक दोनूय समुदायांतल्य कांय विद्यार्थ्यांनी विद्यापीठाच्या कॅम्पसांत होळीचो सण मनयलो. हाचे कांय व्हिडियोय व्हायरल जाल्ले.
होळी खेळिल्ल्यान विद्यापीठ प्रशासनान होळी खेळपी विद्यार्थ्यांक कारणां दाखयात नोटीस दिल्या आनी कॅम्पसांत प्रवेश करपाक बंदी घातली. तशेंच, विद्यार्थ्यांक २४ फेब्रुवारीक तांच्या पालकां सयत विद्यापीठांत पावपाक सांगलें. उपरांत, इस्लामीक कट्टरपंथीयांनी तांचे आड खटलो दाखल केलो.
विद्यापीठाच्या कॅम्पसांत हिंदू आनी मुस्लीम विद्यार्थ्यांनी एकठांये येवन होळी खेळ्ळी. हे खातीर विद्यापीठ प्रशासनान खर भुमिका घेतल्या. विद्यार्थ्यांक विद्यापीठांतल्यान काडून उडोवपाची शिटकावणी दिल्या. होळी खेळटना इस्लामीक कट्टरपंथीयांनी हिंदू विद्यार्थ्यांक धमकावपाचो यत्न केलो. कांय कट्टरपंथीयांनी हिंदू विद्यार्थ्यांच्या धर्मीक उत्सवाचो फकत अपमान करूंक ना. जाल्यार फुडाराक असल्या कसलेय तरेच्या कार्यावळीं पसून पयस रावपाची धमकीय दिली.
मजगतीं, २०२३ त लाहोरच्या पंजाब विद्यापीठांत होळी खेळिल्ले खातीर हिंदू विद्यार्थ्यांचेर हल्लो जाल्लो. होळी खेळपाक पीयू लॉ कॉलेजींत सुमार ३० विद्यार्थी जमिल्ले. हाका लागून विद्यार्थ्यांनी महाविद्यालय प्रशासनाची परवानगीय घेतिल्ली. उपरांत कट्टरपंथी इस्लामीक विद्यार्थी संघटना इस्लामी जमियत तुलाबाच्या लोकांनी विद्यार्थ्यांचेर हल्लो केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
