भांगरभूंय | प्रतिनिधी
आतां मेरेन ६०.०२ कोटी भाविकांनी केलें स्नान: शिवरात्रेक आंकडो वाडपाची शक्यताय
प्रयागराज, खबरां संस्था: आयज महाकुंभाचो ४१ वो दीस. मेळो सोंपपाक ४ दीस उरल्यात. फाटल्या सप्तकाचे निमाणे कडल्यान भाविकांची गर्दी वाडल्या. जात्रेच्या भायल्या भागांत व्हड येरादारी कोयंडी आसा. यमुना न्हंयेचेर पुलाकडेन वचपी रस्तो सुमार ७ वरां सावन जाम आसा.
बांगलादेशांत २०२२ वर्सा जाल्ली ट्रेनीचे उज्याचे घडणुकेक महाकुंभमेळ्याची घडणूक म्हणून वावड्यो पातळावपी ३४ सोशल मिडिया अकावंटां आड पुलिसांनी एफआयआर दाखल केला.
लखनौच्यान आयिल्ले एके बायलेन सांगलें, बसीन म्हाका शारा भायर सोडली. उपरांत आमी शटल बसीन जात्रेक गेलीं. महाका बसीन उबें रावन येवचें पडलें. अर्द्या वराचें अंतर ४ वरांनी कापलें.
प्रयागराजच्या सगळ्या ७ प्रवेशदारांचेर भायल्यान येवपी वाहनांक आडयतात. गाडी शारा भायर पार्किंगांत पार्क करची पडटा. हांगच्या संगमाचें अंतर १० ते १२ किमी आसा.
प्रवेशदाराचेर राविल्ल्या भाविकांक १०-१२ किमी चलत वयचें पडलें. तशेंच, तांचे वेवस्थे खातीर, प्रशासन शटल बसेस, ई-रिक्षा, ऑटो आनी गाडयो चलोवपाक परवानगी दिता. हजारांनी दुचाकी चालक प्रवाशांक घेवन वतात. मात ते सगळे जाणा मनमानी पणान भाडें घेतात.
ऑटो आनी ई-रिक्षा चालक प्रती किमी १०० रुपयां मेरेन भाडें घेतात. दुचाकी चालक ५० रुपया मनमानी भाडें घेतात. अशे परिसिथतींत लोकांक प्रवेशदारा पसून जात्रेक वचपा खातीर ५०० ते १००० रुपया मेजचे पडटात.
दिल्ली ते प्रयागराज विमान भाडें सध्या ३८ ते ४२ हजार रुपयां मजगतीं आसा अशें सांगतात. मात, २६ फेब्रुवारी उपरांत हें भाडें फक्त ३ हजार रुपया आशिल्ल्याचें दिसून येता. अशे परिस्थितींत, ह्या वेळा भाडे १२ पटीन चड आसा.
शेनवारा सांजेवेळार ६ वरां मेरेन १.२९ कोटी भाविकांनी संगमात स्नान केलें. १३ जानेवारीक सावन सुमार ६०.०२ कोटी भाविकांनी स्नान केलें. सरकारान सांगलें, संवसारांत १२० कोटी सनातनी आसात. तांतल्या ५० टक्के लोकांनी संगमात स्नान केलें. २६ फेब्रुवारीक महाशिवरात्रेक हो आंकडो ६५ कोटीं फुडें वतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
