भांगरभूंय | प्रतिनिधी
पणजी ः भारतीय अंतर्गत उदका मार्ग प्राधिकरणाच्या संचालक मंडळान (आयडब्ल्यूएआय) 196 वे बसकेंत देशांतल्या वेगवेगळ्या शारांनी शारी उदका येरादारी वेवस्था विकसीत करपा खातीर कार्यक्षमताय अभ्यास सुरू करपाचो म्हत्वाचो निर्णय घेतला. देशांतल्या 12 राज्यांतल्या 17 शारांनी उदका मेट्रो पुरायपणान वा शारांतल्या कांय वाठारांत सुरू करपाची शक्यताय सोदून काडपाचो निर्णय मंडळान घेतला. हो अभ्यास करपा खातीर कोची मेट्रो रेल्वे (केएमआरएल) कंपनीची नेमणूक केल्या.
ह्या उपक्रमाक लागून सध्याचो उदका मार्ग वापरून एक घटमूट आनी टिकावू शारी येरादारी वेवस्था निर्माण जातली. हें उदका मेट्रो मॉडेल शारी उदका येरादारींत क्रांती घडोवन हाडटलें तशेंच पारंपरीक येरादारी पद्दतींत सुरक्षीत, कार्यक्षम आनी पर्यावरण-अनुकूल पर्याय उपलब्ध जातले.
उदका मेट्रो विकसीत करपा खातीर केंद्रीय बंदरे, जहाज आनी उदकामार्ग मंत्रालयाच्या सल्ल्यान आयडब्ल्यूएआयन अयोध्या, गोंय, गुवाहाटी, कोल्लम, कोलकाता, प्रयागराज, पाटणा, श्रीनगर, वाराणसी, मुंबय, वसय, मंगळूर (गुरुपुरा न्हंय), गांधीनगर-अहमदाबाद (साबरमती न्हंय) ह्या शारांची आनी जुंव्या खाला फेरीबोटी सेवा जोडणी वेवस्थेंत व्हड बदल घडोवन हाडूंक शकता अशी केरळांतली अल्लेप्पी तशेंच लक्षद्वीप आनी अंदमान आनी निकोबार जुंवे ह्या सुवातींची निवड केल्या.
शारांचो मुखेल वाठार आनी भोंवतणच्या नगरपालिका/ पंचायत वाठारांक/ जुंव्यांक ही शारी उदका येरादारी पद्दत उदका मार्गांतल्यान जोडटली आनी हेर येरादारीच्या मार्गा कडेनय एकठांय जातली. तशेंच ही प्रणाली पर्यटन आनी प्रादेशिक अर्थीक उदरगतीकय चालना दितली. ही प्रणाली उर्जा-कार्यक्षम इलेक्ट्रीक फेरी सेवा, आधुनीक टर्मिनल्स वरवीं प्रदुशण मुक्त आनी टिकावू उपाय वापरतली आनी सुरळीत मल्टीमोडल जोडणी सुनिश्चीत करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
