वाद जाले उपरांत तिचेर गाडी मारली आनी….
भांगरभूंय | प्रतिनिधी
पणजी ः जुनसवाडो – मांद्र्यां काल, शुक्रारा रातीं उसरां 11 वरांचेर वेगान वचपी गाडयेचो धपको लागून मारिया फेलिझ फर्नांडिस हिका मरण आयलें. क्षुल्लक कारणांक लागून वाद जाले उपरांत गाडयेन मारिया फेलिझ फर्नांडिस हिका नेटान धपको दिलो. तिका कांय अंतराचेर ओडीत व्हेली. तेन्ना टायरा पोंदा चिड्डून तिका मरण आयलें. हाचे उपरांत ड्रायव्हरान थंय सावन पळ काडलो. दीपन राजीव बत्रा (२३, दिल्ली) अशें ड्रायव्हराचे नांव.
मेळिल्ले म्हायती प्रमाण, फर्नांडिस जुनसवाडो आपल्या घरां लागसार नाल्लाचो वेवसाय करताली. मजगतीं फाटल्या कांय दिसां सावन मूळ दिल्लींतले एक कुटुंब हांगा रावता. तांतूतले कांय वांगडी रातच्या वेळार पासय मारपाक थंय येतालें. तांचे वांगडा तांचो सुणो आसतालो. ते वेळार तांचो सुणो आनी फर्नांडिस हांच्या दोन सुण्यां मदीं खूबदां झगडीं जातालीं. पूण काल फर्नांडिसान त्या कुटुंबाक तांच्या सुण्याचेर नियंत्रण दवरपाक सांगलें. मजगतीं कांय गैरसमज जाल्ल्यान तांचे आनी फर्नांडिस मदीं वाद जालो.
पर्यटक कुटुंबांतले एके बायलेन फर्नांडिस हांच्या केंसांक धरून सकयल उडयली. पूत जोसेफ आवयक पळोवंक घरांतल्यान धांवून आयलो. ताच्या खांद्याक दुखापत जाल्ल्यान तो मजत करूंक शकलो ना. मजगतीं, थंय आशिल्ल्या आनीक एका मनशान तिका उखलून कदेलाचेर बसयली. कांय वेळ वाद घालून तें कुटुंब गाडयेंत बसले आनी थंयच्यान वेगान वतना तांणी कदेलाचेर बशिल्ल्या फर्नांडीसाक धपको दिलो. सुमार धा मीटर मेरेन तिका ओडून व्हेली. हांतूत गाडयेच्या टायरा पोंदा चिड्डून तिका मरण आयलें. ही घडणूक सीसीटीव्ही कॅमेरात कैद जाल्या. हे घडणुके उपरांत गाडयेचो ड्रायव्हर स्वता मांद्र्यां पुलीस स्टेशनांत गेलो.
मजगतीं, काल रातीं उसरां घडिल्ली हे घडणुकेक लागून थळाव्या लोकांक व्हड धपको बसला. आयज सकाळीं सुमार 5 वरां मेरेन थळावे लोक मांद्र्यां पुलीस स्टेशनाच्या भायर जमिल्ले. ते तिडकल्यात आनी त्या दिल्लीच्या कुटुंबाचेर कारवाय करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
