भांगरभूंय | प्रतिनिधी
म्हापशें, प्रतिनिधी ः साळगांवां पुलिसांनी धाड घालून अडेज लाखांचो अडेज किल गांजो जप्त केलो. ह्या प्रकरणांत दुबावीत राजाराम सीताराम बनवासी (36, दिंडोरी- मध्य प्रदेश) हाका अटक केली.
शेनवार, 22 तारखेक सकाळीं साळगांव पुलिसांनी साळगांव सिमित्री कडेन ही कारवाय केली. थंय ड्रग्स विक्रीं विशींची म्हायती पुलिसांक मेळिल्ली. ते प्रमाण पुलिसांनी सांपळो घालून दुबाविताक घडणुक सुवातेर पावतकच ताब्यांत घेतलो.
तपासणे वेळार दुबावित बनवासी हाचे कडेन 2.533 किल गांजो मेळ्ळो. ह्या गांजाचें मोल 2 लाख 50 हजार रुपया आसा. गांजो जप्त करुन पुलिसांनी घुंवळे वखदां विरोधी कायद्या खाला गुन्यांव नोंद करून दुबाविताक अटक केली. पुलीस निरिक्षक सोमनाथ माजिक हांच्या मार्गदर्शना खाला उपनिरिक्षक दिशन नायक आनी अक्षय गांवकार हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
