भांगरभूंय | प्रतिनिधी
पणजी : गोंय वैजकी म्हाविद्यालय हॉस्पिटलांत फिजीओथेरपी आनी ओकुपेशनल थेरापी संशोधन केंद्र सुरू जातलें. तशेंच फिजीओथेरपी आनी ओकुपेशनल थेरपी पीजी अभ्यासक्रमाचे जागे वाडटले, अशें गोंय वैजकी म्हाविद्यालय हॉस्पिटलाचे डीन डॉ. शिवानंद बांदेकार हांणी सांगलें.
ओकुपेशनल थेरापिस्टांच्या (ओटीकोन) वर्सुकी परिशदेंत ते उलयताले. ओटिकोन 2025 परिशदेचे उक्तावण कला अकादमींत जालें. राज्यसभा वांगडी सदानंद शेट तानावडे, डॉ. विवेक वजरतकार, परिशदेचे पदाधिकारी पंकज वाजपेयी, डॉ. ज्योतिबा बिजलानी तशेंच हेर मानेस्त परिशदेक हाजीर आशिल्ले.
वैजकी फांट्या इतलीच फिजीओथेरपी आनी ओकुपेशनल थेरपी फांटो म्हत्वाचो आसा. ऑपरेशन वा हेर उपचार जाले काय व्यायाम तशेंच आहार हो उपचाराक पुरक आसपाक जाय. हे विशीं मार्गदर्शन वा प्रशिक्षण दिवपाची जापसालदारकी फिजीओथेरापिस्टाची आसता. गोंय वैजकी म्हाविद्यालयांत आतां ओन्कोलॉजी ओकुपेशन थेरपी हो पीजी अभ्यासक्रम सुरू जावपाचो आसा. गोंय वैजकी म्हाविद्यालयांत 2013 वर्सा ओकुपेशनल थेरपी विभाग सुरू जाल्लो. आतां ह्या फांट्याचो बरोच विस्तार जाला, अशें डॉ. बांदेकार हांणी सांगलें.
राज्यांत वा देशांत दर्जेदार वैजकी सुविधा निर्माण करपा खातीर धोरण थारावपी मंत्री, आमदार, संशोधक आनी प्रॅक्टीस करपी दोतोर हांचे मदीं समन्वय आसपाक जाय. परिशद वा बसकां वरवीं समन्वय सादप शक्य जाता, अशें राज्यसभा खासदार सदानंद शेट तानावडे हांणी म्हणलें.
ह्या वेळार फिजीओथेरपी आनी ओकुपेशनल थेरपीत बरो वावर करपी दोतोरांचो भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
