भांगरभूंय | प्रतिनिधी
शैलेश झिंगडे : देशांत 11 वें सुवातेर आशिल्ल्याचो दावो
भांगरभूंय । समीप नार्वेकार
पणजीः गोंयांतल्या शाळांतल्या 73 टक्के विद्यार्थ्यांची अपार कार्डा खातीर नोंदणी जाल्या. फक्त आठ शाळांनी अपार प्रक्रिया अजून मेरेन चालीक लागूंक ना. विद्यार्थ्यांची अपार नोंदणी करपी संख्येचे बाबतींत गोंय देशांत 11 वे सुवातेर आसा. 95 टक्के विद्यार्थ्यांची आपार नोंदणी करपाची आमी मोख दवरल्या, पूण हें आव्हानात्मक काम आसा, अशी म्हायती शिक्षण संचालक शैलेश झिंगडे हांणी दिली.
शिक्षण मळार डिजिटायजेशन करपा खातीर गोंय सरकारान विद्यार्थ्यांक बारा अंकी अपार वळखपत्र दिवपाचें घोशीत केल्लें. विद्यार्थ्यांक एक डिजिटल वळख दिवन तांचो शिक्षणीक रेकॉर्ड आनी तांचे प्रगतीचेर देखरेख दवरप हाचो हेतू आसा. अपार वळखपत्र ही विद्यार्थ्यांची मुळावी वळख म्हूण वापर करपाची मोख दवरून शाळा बदली आनी स्थलांतर करपा खातीर, तशेंच फुकट पाठ्य पुस्तकां, माध्यान्य आहार आनी हेर सरकारी लाव घेवपा खातीर अपार कार्डाचो वापर जातलो.
गोंयांत सुमार 2.99 लाख विद्यार्थी आसात. तातूंतले 2.13 लाख विद्यार्थ्यांनी अपार कार्डा खातीर नोंदणी केल्या. देखून अपार नोंदणी करपी विद्यार्थ्यांची संख्या सरासरी 73 टक्के इतली आसा. 1472 शाळांनी अपार कार्ड तयार करपाची प्रक्रिया चालीक लागल्या आनी फक्त आठ शाळांनी ही प्रक्रिया सुरू जावची उरल्या, अशी म्हायती झिंगडे हांणी दिली.
95 टक्के विद्यार्थी अपार कार्डा खातीर नोंद करपाची मोख आमी दवरला. दरवर्सा नवीन विद्यार्थी शाळेंत येतात, देखून तंत्रीक दिश्टीन 100 टक्के कशेंच शक्य ना. फुडाराक विद्यार्थ्यांची अपार नोंदणी करप हे आमचे खातीर कठीण आनी आव्हानात्मक जातलें, अशें झिंगडे हांणी म्हणलें.
अपार करतले जाल्यार विद्यार्थ्यांचे आधार पयलीं जोडचें लागता आनी आधार जोडणेक लागून कटकटी तयार जातात. महाराष्ट्रांत अपार नोंद आशिल्ल्या विद्यार्थ्यांची संख्या 84 टक्के आसा. थंय भुरग्यांच्या आधार कार्डा सयत सगळे मराठींत चलता. पूण गोंयांत भुरग्यांचीं इंग्लीश नांवां सारकीं आसात, पूण देवनागरी नांवां सारकीं नाशिल्ल्यान आधार जुळना. दुसरें कारण म्हणल्यार भुरग्यांचें अपार करपा खातीर पालक कशेच तयार जायनात. तांकां समजावप हें खूब कठीण. आधाराचो गैरवापर जायत म्हूण ते आपले आधार नंबर दिनात, अशें झिंगडे हांणी सांगलें.
73 टक्के अपार नोंदणी करप सोंपें नाशिल्लें. शिक्षक आनी अधिकाऱ्यांनी कश्ट घेत विद्यार्थ्यांची नोंदणी केल्या. शिक्षकांनी आपलो स्वताचो वेळ, पयसो खर्च करून पालकांक मेळून तांकां समजयल्यात. तशेंच हे मोहिमेंत गांवचे सरपंच आनी आमदारांनी पालकां खातीर विशेश शिबिरां घेवन अपार नोंदण्यो केल्यात, अशी म्हायती झिंगेड हांणी दिली. अपार वरवीं विद्यार्थ्यांचे डीजी लोकर तयार जातलो आनी सगळ्या विद्यार्थ्यांचे दस्तावेज तांकां डिजिटल स्वरुपांत मेळटले. जर विद्यार्थ्यांची फाल्यां नोकरे खातीर मुलाखत आसा आनी गुणपत्रिका शेणल्या जाल्यार तांकां आबूज जावपाची गरज ना. तांकां डिजिटल मार्कशीट खंयच्याय खिणाक मेळटलें. अपार सक्तीचें ना अशें केंद्रान घालून दिल्ल्या मार्गदर्शक तत्वांत स्पश्ट म्हणलां. फुडाराक अपार हें सक्तीचें जावं येता आनी अपार कार्ड करप हातूंत कसलेंच लुकसाण ना, अशें झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
