भांगरभूंय | प्रतिनिधी
विसंगत अहवालाक लागून जिल्लो रजिस्ट्राराची कारवाय
मडगांव ः मेल्लो मनीस जिवो आशिल्ल्याचें दाखोवपी विसंगत अहवाल सादर केल्ल्यान आनी खोटी म्हायती दिल्ल्यान मडगांव न्यू मार्केट ट्रेडर्स असोसिएशनाची नोंदणी जिल्लो रजिस्ट्रारान रद्द केल्या. आतां न्यू मार्केट ट्रेडर्स असोसिएशन म्हणून नवी समिती स्थापन केल्या अशी म्हायती नवे समितीचे सल्लागार विनोद शिरोडकार हांणी दिली.
ही म्हायती मडगांवांत जाल्ले पत्रकार परिशदेंत दिली. ह्या वेळार नवे वांगडी घेवन नवी समिती तयार करपाची आसा. न्यू मार्केटांतल्यो जायत्यो समस्या सोडोवपाचे यत्न चालूच उरतले. नवे समितीचे अध्यक्ष म्हणून दामोदर घोडे, सचीव शोभा गांवकार आनी खचिनदार म्हणून संजय नायक हांची निवड जाल्या. नव्या समितीची नोंदणी प्रक्रिया ही समिती करतली. उपरांत परतून वेंचणूक जातली आनी अध्यक्षाची निवड करतले.
न्यू मार्केटांत पार्किंगाची व्हड समस्या आसा. ह्या समस्याक लागून लोकांक मार्केटांत येवप कठीण जाता. रस्त्यार गाडी उबी करून लोक मार्केटांत येवपाक टाळटात. हाचे भायर मार्केटांत वेपाऱ्यां खातीर, मुखेलपणान बायलां खातीर बरे शौचालय बांदपाची मागणी केल्या. हाचे भायर मार्केटाच्या सुरक्षेच्या नदरेन उजो लागल्यार उदकाची सोंपेपणान सोंय आसची म्हूण उदकाची टांकीय बांदपाची मागणी करतले अशें शिरोडकार हांणी सांगलें.
मडगांव न्यू मार्केट ट्रेडर्स असोसिएशन म्हूण हे संस्थेची पयली नोंद जाल्ली. 1991 वर्सां ताची नोंदणी केल्ली. 29 जून 1997 दिसा जाल्ले संघटनेचे बसकेंत अशोक मयेकार हजर आशिल्ले आनी तांणी सय केल्ली. पूण 1996 वर्सां अशोक मयेकाराक मरण आयल्लें. चुकीचो अहवाल सादर केल्ल्यान आनी संस्थेच्या कामांत विसंगतताय मेळिल्ल्यान हे संस्थेची नोंदणी रद्द करपाचो आदेश रजिस्ट्रारान जारी केला. हे फाटभुंयेर सल्लागार विनोद शिरोडकार, राजन आजगांवकार, अमित नायक हांच्या आदारान नवी समिती स्थापन केल्या. नगरपालिका प्रशासन आनी ह्या वाठारांतल्या तिनूय आमदारांनी मडगांव न्यू मार्केटाची स्थिती सुदारपा खातीर यत्न करचे अशी मागणी विनोद शिरोडकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
