भांगरभूंय | प्रतिनिधी
वाळपय : गोंय ते बेळगांव मजगतींच्या मार्गार सेगीत प्रवास करपी वाहन चालकां खातीर बरी खबर. फाटल्या कितल्याशाच म्हयन्यां सावन कर्नाटक हद्दींत सामकी वायट अवस्था जाल्ल्या रस्त्याक लागून चालकांनी बरेच त्रास सोंशिल्ले. मात आतां वाहन चालक आनी नागरिकांक ह्या रस्त्यावेल्यान बिनधास्त प्रवास करपाची संद निर्माण जाल्या. कारण गोंय ते कर्नाटकांतल्या पिरणवाडी भागा मेरेन कर्नाटक सरकारान ह्या रस्त्यार नव्यान डांबरीकरण केल्ल्यान बरे तरेची सुविधा संबंधितांक उपलब्ध जाल्या. हाका लागून नागरिकांनी आनी प्रवाशांनी समाधान उक्तायलां. तशेंच कर्नाटक सरकाराचे उपकार मानले.
गोंय-कर्नाटक ह्या दोनूय राज्यांक जोडपी चोर्ला घाटाच्या मार्गाचेर फाटल्या कांय वर्सां सावन प्रवाशांचो आंकडो वाडला. गोंयच्या नागरिकांना बेळगांवां बर्या बाजारपेठेची सुविधा निर्माण करता. हाका लागून गोंयचे नागरीक व्हडा प्रमाणांत बेळगांवां बाजाराक वतात. खास करून शेनवार आनी आयतारा व्हडा प्रमाणांत गोंयकार बेळगांव शाराक भेट दितात. मात फाटल्या कितल्याशाच म्हयन्यां सावन गोंय हद्दी पसून ते बेळगांव शाराच्या पिरनवाडी वाठारा मेरेन रस्तो बरोच इबाडिल्लो. जायत्या सुवातांचेर फोंडकुलां पडिल्लीं. हाका लागून ह्या रस्त्या प्रवास करप खूब त्रासाचो आसलो. आतां हे त्रास पयस जाल्यात. कर्नाटक सरकारान ह्या रस्त्याच्या डांबरीकरणाक सुरुवात केले उपरांत टप्प्याटप्प्यान हें काम पुराय जालां.
कर्नाटक भागांतल्या गोंय हद्दी मेरेन डांबरीकरणाचें काम पुराय जालां. हाका लागून आतां ह्या रस्त्यावेल्यान बिनधास्त प्रवास करप शक्य जातलें. कणकुंबी कर्नाटका पसून गोंय हद्दी मेरेन दोन दिसां आदं रस्त्याचें डांबरीकरण पुराय केलें.
प्रवाशां मदीं वाड जावपाची शक्यताय
गोंयच्यान चोर्ला मार्गान बेळगांव वचपा खातीर बरो रस्तो उपलब्ध जाल्ल्यान प्रवाशांच्या आंकड्यांत वाड जावपाची शक्यताय आसा. बेळगांव भागांतल्यान नागरीक व्हडा प्रमाणांत गोंयांत वेपारा खातीर येत आसतात. दर दिसा व्हडा प्रमाणांत भाजी, फळांची येरादारी ह्याच रस्त्यावेल्यान जायत आसता. हाका लागून आतां हे येरादारीच्या प्रमाणांतूय वाड जावपाची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
