भांगरभूंय | प्रतिनिधी
केंद्रीय मुखेल म्हायती आयुक्त हिरालाल हांची म्हायती
पणजीः म्हायती हक्क कायदो (आरटीआय) काय जाणां खातीर धंदो जावन रावला. 30 टक्के लोक म्हायती हक्काचो गैरवापर करून शोषण करतात. काय आरटीआय कार्यकर्ते हजारांनी आरटीआय अर्ज करतात आनी सुनावणे वेळार गैरहजर रावतात. फक्त 75 टक्के लोक ह्या कायद्याचो योग्य वापर करतात, अशीं खंत केंद्रीय मुखेल म्हायती आयुक्त हिरालाल सामारीया हांणी उक्तायली.
केंद्रीय मुखेल म्हायती आयुक्त हिरालाल हांचे हस्तुकी गोंय राज्य म्हायती आयुक्ताची सुधारीत वेबसायटीचें उक्तावण जालें. पणजे पाट्यार आयुक्ताच्या कचेरेत जाल्ल्या सुवाळ्यांत राज्य मुखेल म्हायती आयुक्त अरविंद कुमार नायर, राज्य म्हायती आयुक्त आत्माराम बर्वे, मुखेल निर्वाचन अधिकारी रमेश वर्मा आनी हेर मानेस्त हजर आशिल्ले.
ह्या वेळार उलयतना हिरालाल हांणी आरटीआय कायद्याच्या गैरवापरा विशीं खंत उक्तायली. सध्या खुबशे आरटीआय कार्यकर्ते जाल्यात. तशेंच हेर लोक अर्ज घालतात. वर्सांक एक हजार तरी अर्ज येतात. हांतूतले 20 ते 30 टक्के लोक ह्या कायद्याचो गैरवापर करून हांतूतल्यान धंदो करपाक सोदतात आनी प्रशासनांतल्या अधिकाऱ्यांचे शोषण करतात. पूण, 70 ते 75 टक्के लोक ह्या कायद्याचो योग्य वापर करतात, अशें हिरालाल हांणी सांगलें.
काय जाणांक अर्ज घालपाची सवय जाल्या. जेन्ना ह्या अर्जाचेर सुनावणी जाता तेन्ना हे अर्जदार प्रत्यक्ष सुनावणेंक येनात. बाकीचे अधिकारी हजर आसतात. देखीक, एका प्रकरणांत हांवे दिल्ली पुलीस अधिकारी, मनीस हक्क आयोगाचे अधिकारी आनी हेर 100 अधिकाऱ्यांक सुनावणे खातीर आफयले. ते हजर रावले पूण जांचेनी हांचे आड अर्ज केल्लो तो मनीसच गायब आसलो, अशें हिरालाल हांणी म्हणले.
आरटीआय कायद्यानुसार आमी कोणाचेर अर्ज घालपाक निर्बंध घालपाक शकनात. तांका जाय ती म्हायती वा आंकडेवारी विचारपा खातीर मेकळीक आसा. तांणी रु. 10 भरून आपलो अर्ज भरचो. जे किदें म्हायती आमी मागता ती समाजा खातीर उपेगी पडटली कांय? तांचे फाटले बरो वा वायट हेत आसा काय? हाचेर विचार करचो, अशीं सुचोवणी हरिलाल हांणी दिली.
आमकां 50 लाख आरटीआय अर्ज येतात. केंद्रीय म्हायती अधिकारी आनी राज्य म्हायती अधिकारी वेळ मर्यादे नुसार 30 दिसां भितर 97 टक्के आरटीआय अर्ज निकालात काडटात. तांतूतले 3 ते 2 टक्के अर्ज पयलीं अपिलीय अधिकारीणी वयतांत जाल्यार तांतूतले 1 ते 2 टक्के अर्ज दुसरी अपिलीय अधिकारीणी वचून निकालात येतात अशीं म्हायती हरिलाल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
