भांगरभूंय | प्रतिनिधी
म्हापशें : सेंट मायकल वाडो, हणजुणा बेकायदो घरांत घुसून फिर्यादी ब्रॉन्वीन सिनारी कुटुंबाक घरांतल्यान भायर काडपाच्या प्रकरणांत गुन्यांव फांट्यान मुखेल दुबावीत आरोपी जनार्दन खोराटे (रा. मूळ चंदगड) हाका अटक केली. तशेंच ह्या प्रकरणांत वापरिल्ल्या म्हापशेंच्या आर्यन सेक्युरिटी एजन्सीचो परवानो रद्द करपाची मागणी संबंदीत प्राधिकरणा कडेन पुलीस करतले.
फाटल्या १७ तारखेक दुबावीत खोराटे हाचो अटकपूर्व जामीन अर्ज म्हापशें अतिरिक्त जिल्लो आनी सत्र न्यायालयान भायर मारिल्लो. उपरांत बुधवारा पुलिसांनी दुबाविताक अटक केली. हे विशीं हणजूण पुलिसांनी दुबावीत राकेश नंदकिशोर राहा (३६, रा. साखळे आनी मूळ उत्तरप्रदेश), परशुराम शंकर गांवस (४२, रा. वाडी नादोडा, बार्देस) आनी विकी विजय नायक (२०, इल्हास, पोरणें गोंय) या तिघाना आर्यन सेक्युरिटी एजन्सीच्या बावन्सरांक अटक केल्ली. मजगतीं, तांची जामिनाचेर सुटकाय जाल्ली.
हो प्रकार ८ फेब्रुवारीक सकाळच्या १०.४५ वरांचेर घडल्लिो. दुबावीत खोराटे हांणी १५ ते २० लोकांचे मजतीन घरांत गुन्यांवकारी तरेन घुसून, कुटुंबाक धमकावन, घरांतलें मोलादीक सामान तशेंच ३ लाख रोख चोरी केल्ल्याचो आरोप फिर्यादी ब्रॉन्विन सिनारी आनी कुटुंबान कागाळींत केल्लो. हे विशींचो फुडलो तपास गुन्यांव फांट्याचे पुलीस निरीक्षक तुषार लोटलीकार करतात.
कॅनडा रावपी मायकल पीटर ह्या विदेशी नागरिकान फाटल्या २००३ वर्सा संबंदीत घर थळाव्या कडल्यान विकत घेतिल्ले. उपरांत ह्या घरांत ब्रॉन्विन सिनारी ही, तिचो घोव राजेंद्र सिनारी कुटुंबा वांगडा रावतालीं. जाल्यार पीटर हांणी कालांतरान हे मालमत्तेचें मुखत्यारपत्र दुबावीत जनार्दन खोराटे हांकां दिलें. उपरांत हे मालमत्तेचो ताबो मेळपाच्या हेतान दुबावितान कायदो हातांत घेवन सिनारी कुटुंबियांक घरांतल्यान भायर काडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
