भांगरभूंय | प्रतिनिधी
श्रीनगर, खबरां संस्था ः जम्मू-काश्मीरांतल्या नियंत्रण रेशेचेर (Line of Control- LoC) आशिल्ल्या तणावांच्या फांटभूंयेर आयज पुंछ सेक्टरांत भारत आनी पाकिस्तान हांचे मदीं फ्लॅग बसका जातली. फाटल्या चार वर्सांत दोनूय देशांची ही पयलीच बसका. निमाणी फ्लॅग बसका 2021त जाल्ली.
जम्मू-काश्मीरांतल्या नियंत्रण रेशेचेर फाटल्या कितल्याशाच सप्तकां सावन तणाव निर्माण जाला. 4 फेब्रुवारीक लश्करान 7 पाकिस्तानी घुसखोरांक मारले. 13 फेब्रुवारीक पाकिस्तानी सैनिकांनी युद्धविरामाचे उल्लंघन केल्ल्याची खबर आयली. उपरांत सैन्यानी हें न्हयकारलें.
नियंत्रण रेशेचेर 5 घडणुको…
० 16 फेब्रुवारीक जम्मू-काश्मीरांतल्या नियंत्रण रेशेचेर आशिल्ल्या पूंछ सेक्टरांत स्नायपर फारपेट जालो आनी तातूंत भारतीय सैनिक जखमी जालो. हे घडणुके उपरांत कांय काळ भारतीय आनी पाकिस्तानी सैनिकां मदीं फारपेट चालूच आशिल्लो.
० 13 फेब्रुवारीक भारताचे शिमेचेर पाकिस्तानांतल्यान फारपेट जाल्ल्याची खबर आयली.
० जम्मू जिल्ह्यांतल्या अखनूर सेक्टरांतल्या नियंत्रण रेशे लागसार लालोली वाठारांत आयईडी स्फोट जाल्लो. हांतूत 2 लश्करी जवान शहीद जाल्लें. आनी एक जखमी जाल्लो. 11 फेब्रुवारीक दनपारां 3:50 वरांचेर भट्टल वाठारांत लश्करी जवान गस्त घालता आसतना हो स्फोट जालो.
० भारतीय सैन्यानी 7 पाकिस्तानी घुसखोरांक जिवेशी मारिल्ले. प्रसार माध्यमांनी दिल्ले म्हायती प्रमाण, ही घडणूक 4 फेब्रुवारीचे रातीं पुंछ जिल्ह्यांतल्या कृष्ण घांटी लागसार नियंत्रण रेशे लागसार घुसखोरी करपाचो यत्न केल्लो तेन्ना घडली अशें सुत्रांनी सांगलें. फुडल्या भारतीय लश्करी चौकीचेर हल्लो करपाची येवजण आसा असो दावो सूत्रांनी केलो.
० 14 जानेवारीक जम्मू-काश्मीरांतल्या राजौरी हांगा नियंत्रण रेशे लागसार जाल्ल्या भूसुरुंग स्फोटांत गोरखा रायफल्साचे स जवान जखमी जाल्ले. भवानी सेक्टराच्या मकरी वाठारांत हो स्फोट जाल्लो. खांबा किल्ल्या लागसार सैनिकांची एक टोळी गस्त घालताली. त्या वेळार एक सैनिकान चुकून सैन्यान लायिल्ल्या भुंयसुरुंगाचेर पावल घालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
