भांगरभूंय | प्रतिनिधी
सांस्कृतीक दायजाची राखण करपाक, शिक्षणांत सुदारणा करपाक आनी समानतेचेर आधारित आनी सवस्तकायेच्या समाजाची पोसवण करपाक भास सांबाळपाचें म्हत्व ह्या मार्गदर्शक तत्वांचेर हो सुवाळो भर दिता.
आज 21 फेब्रुवारी, संवसारीक आवयभास दीस. अंदुचो विशय आसा, आंतरराष्ट्रीय आवयभास दिसाचो रुप्या महोत्सव मनोवया. लोक संपर्क – संवादा वांगडाच शिक्षण आनी शाश्वत उदरगती खातीर भासो गरजेच्यो. गिन्यानाचें हस्तांतरण आनी संस्कृताय सांबाळपाचें मुखेल साधन म्हणून भासो काम करतात. आयज संवसारांत सुमार आठ हजारा वयर भासो आसात. पुण जागतिकीकरण आनी समाजीक बदलांक लागून जायत्यो भासो ना जावपाचो धोको वाढत आसा. शिक्षण वेवस्था आपले आवयभाशेंत शिकपाच्या हक्काक आदार दिता हाची खात्री करप, शिकपाचे परिणाम सुदारपा खातीर म्हत्वाचें. कारण तांकां पुरायपणान समजपी भाशेंत शिकयलें जाल्यार विद्यार्थी चड बरे तरेन समजतात, शिक्षणा कडेन चड प्रतिबद्धताय आनी विचार करपाची कुशळटाय दाखयतात. पुण आमच्या भवभाशिक देशांत प्रशासन आनी वेपार उदिमाच्या मळार इंग्लिशीचें वर्चस्व अजून आशिल्ल्यान देशी भाशांतल्या शिक्षणाक नेट मेळना. शिक्षणाच्या मळार आवयभासांची ही अबरगत चडशे कडेन जायत चल्ल्या. आमच्या गोंयांत हाचे परस वेगळी परिस्थिती ना.
भोवभाशीक शिक्षण, खास करून अल्पसंख्यांकीय आनी देशी भाशांतलें शिक्षण फकत शिकपी लोकांक मजत करता इतलेंच न्ही तर शिक्षण आनी संस्कृताय हांचे मदीं खोलायेन संबंद जोडटा, जाका लागून समाज चड समावेशक आनी समतावादी जावपाक योगदान आनी बळगें मेळटा. आयचे परीस्थितींत हें खूप गरजेचें.
आंतरराश्ट्रीय आवयभास दिसाचो 25 वो वर्धापन दीस आयज भाशीक विविधताय तिगोवन दवरपाच्या आनी आवयभासांचो प्रसार करपाच्या 25 वर्सांच्या यत्नांचो आनी वावराचो उत्सव मनयता. सांस्कृतीक दायजाची राखण करपाक, शिक्षणांत सुदारणा करपाक आनी समानतेचेर आधारित आनी सवस्तकायेच्या समाजाची पोसवण करपाक भास सांबाळपाचें म्हत्व ह्या मार्गदर्शक तत्वांचेर हो सुवाळो भर दिता.
पयलेच खेपे युनेस्कोन जाहीर केल्लो आनी उपरांत संयुक्त राश्ट्रांच्या सार्वत्रिक सभेन आपणायिल्लो आंतरराश्ट्रीय आवयभास दीस, मायभाशेक प्राधान्य दितनाच भाशिक विविधताय आनी सांस्कृतिक दायज सांबाळप आनी शिक्षण घटमूट करून शाश्वत उदरगतीचीं ध्येयां साध्य करपाक भाशांची भुमिका हाचेरय भर दिता.
भोवभाशीक शिक्षण समावेशक समाजांक चालना दिताच, पूण तेच बराबर दुर्बळ गट, अल्पसंख्यांकांच्यो आनी देशी भासो सांबाळपाकय आदार करता. सगळ्या व्यक्तींक शिक्षणाची समानताय आनी आजीवन शिकपाची संद मेळपा खातीर हो दीस खरेपणी बुन्यादीचो फातर. संवसारीकरणांत आपली प्रादेशिकता विरघळची ना मूं हाची दक्षता घेवपाक आपली भाशा, संस्कृती हांचो सांबाळ करुन संवसारीकरणाचें आपले प्रादेशिकताये वांगडा संकरीकरण करपाक आमी खरेंतर वावरुंक जाय. तरुच आमी तिगून उरतले. पूण संवसारीकरणांत गुल्ल आशिल्ल्या समाजाक, आपल्यो भासो विसरत चलिल्ल्या समाजाक ह्या दिसाची म्हायती तरी आसा काय कितें असो दुबाव मारता!
–प्रकाश कामत
94224 43093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
