भांगरभूंय | प्रतिनिधी
रेल्वे उड्डाण पुला खातीर गवंडाळे – पोरणें गोंय रस्तो वर्सभर बंद
भांगरभूंय । प्रतिनिधी
पणजी : पर्वरी उड्डाण पुलाक लागून म्हापशें सावन पणजे येवप आडखळीचें थारता. आतां रेल्वे उड्डाण पुलाच्या कामा खातीर गवंडाळी – पोरणे गोंय रस्तो वर्सभर बंद दवरपाचो निर्णय जाला. एक मांडवी पूल बंद आशिल्ल्यान दुसऱ्या पुलाचेर सेगीत येरादारीची कोंयडी जाता. वयल्यान पणजे शारांत स्मार्ट सिटीचीं कामां चालू आसात. हाका लागून फुडल्या दिसांनी उत्तर गोंयांतल्यान राजधानी पणजे येवप त्रासाचें थारतलें. पणजे पावपा खातीर सगळ्या मार्गांचेर येरादारी कोंयडेक तोंड दिवचें पडटलें.
गवंडाळी – पोरणे गोंय रस्त्याचेर आशिल्ल्या रेल्वे क्रॉसिंगाचेर उड्डाण पूल बांदपाचें काम सुरू जालां. ह्या कामाक लागून 25 फेब्रुवारी 2025 ते 19 जानेवारी 2026 मेरेन गवंडाळी ते पोरणे गोंय रस्तो बंद आसतलो. सगळ्यो गाडयो बाणस्तारी मार्गा वयल्यान पोरणें गोंया वतल्यो. दुचाकी तशेंच ल्हान गाडयां खातीर गवंडाळे पुला वयल्यान खोर्ली आयडीसी वाठारांतल्यान पोरणे गोंय वचपाची मेकळीक आसतली. सुमार वर्सभर गवंडाळी – पोरणे गोंय रस्तो बंद आसतलो.
सांखळी, होंडा, वाळपय, आमोणें, सुर्ला, न्हावेली, खांडोळें वाठारांतले सगळे जाण पणजे पावपा खातीर गवंडाळे – पोरणे गोंय मार्गाचो वापर करतात. हाका लागून दिसाक 30 ते 40 हजारां वयर गाडयो ह्या रस्त्या वयल्यान वता. कांय वेळार व्हड बशी लेगीत ह्या रस्त्यान वतात. ह्या सगळ्या गाडयांक आतां बाणस्तारी वा खोर्ली पीडीए मार्गान वचचें पडटलें. बाणस्तारी, खोर्ली रस्त्याचेर फोंडें, मडगांव सावन येवपी गाडयांची सेगीत गर्दी आसता. आतां सांखळी, वाळपय, होंडा वाठारांतल्यान येवपी गाडयांची भर पडटली. हातूंत सकाळीं आनी सांजे येरादारी कोंयडेचें प्रमाण वाडटलें.
जुवारी पुलाच्या कामाक लागून वास्को, मडगांव सावन पणजे येवपी प्रवाशांनी फाटलीं चार वर्सां खूब त्रास सोंसले. जुवारी पूल पुराय जाल्ल्यान दक्षीण गोंया सावन थेट पणजे येवपी प्रवाशांक थाकाय मेळ्ळ्या.
तशेंच हाचे पयलीं खूब वर्सां पोरणे गोंय ते पणजी म्हामार्गाचें काम चलतालें. हाका लागून येरादारीची कोंयडी जाताली. उपरांत चिंबल उड्डाण पुलाक लागून फाटलीं दोन वर्सां येरादारीची कोंयडी जाताली. स्मार्ट सिटी खाला रायबंदर रस्त्यांचीं कामां चालू आसतना रायबंदर रस्तो कांय काळ बंद आशिल्लो. हाका लागून फाटलीं कांय वर्सां फोंडें वा माशेल सावन पणजे पावपा खातीर उशीर लागतालोच, आतां रेल्वे उड्डाण पुलाक लागून परतून उशीर जातलो. दुरुस्ती खातीर सध्या मांडवी न्हंये वयलो एक पूल बंद आसा. तशेंच पर्वरी उडडाण पुलाक लागून सांगोल्डें ते पर्वरी अटल सेतू मेरेन येरादारी दुसऱ्या मार्गान घुंवडायल्या हाका लागून पेडणें, म्हापशें, अस्नोडें, दिवचल सावन पणजे येवपी येरादारीक उशीर जाता. येरादारीची कोंयडी जावपाचें प्रमाण वाडटा आनी हाचो नोकरदार, विद्यार्थी तशेंच हेरांक त्रास जाता. पेडणें, म्हापशें, दिवचल, वाळपय, सांखळी वाठारांतल्यान पणजे दिसाक लाखभर गाडयो येतात. हजारांनी नोकरदार आनी विद्यार्थी पणजे येतात. सकाळीं पणजे पावप आनी सांजे पणजे सावन घरा पावप ह्या सगळ्यां खातीर त्रासाचें थारतलें. हातूंत भर म्हणल्यार पणजे स्मार्ट सिटीच्या कामाक लागून कांय रस्ते बंद आसात. हाका लागून पणजे भोंवतना लेगीत येरादारी कोंयडीक फुडो करचो पडटा.
गवंडाळे ते पोरणे गोंय रस्तो 25 फेब्रुवारी 2025 ते 19 जानेवारी 2026 मेरेन बंद आसतलो. गाडयो बाणस्तारी वा गवंडाळे सावन खोर्ली पीडीए (फकत एलएमव्ही) मार्गांन घुंवडायतले.
उदरगत जाय जाल्यार कांय प्रमाणांत त्रास सोंसचे पडटले. रेल्वे उड्डाण पूल जाल्या उपरांत आतां क्रॉसिंगा वेळार रावचें पडटा, तशें रावचें पडचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
