भांगरभूंय | प्रतिनिधी
4 दुर्मीळ सुकण्यांचो आस्पाव
भांगरभूंय । प्रतिनिधी
पणजी : गोंयांत 14 ते 17 फेब्रुवारी मेरेन ‘ग्रेट बँकयार्ड बर्ड कावंट’चें आयोजन केल्लें. ह्या काळांत गोंयभरांत 300 तरांच्या सुकण्यांची नोंद जाली. ह्या बर्ड कावंटांत गोंयांत आतां मेरेन सांपडिल्ल्या 493 मदल्या सुकण्यांतलीं 61 टक्के सुकणीं वयल्या चार दिसांनी दिसलीं. तातूंत रॅड थ्रोटेड पिपीट, रॅड नेक्ड फाल्कन, युराशियन विजेन आनी फॉर्क स्विफ्ट ह्या चार दुर्मीळ सुकण्यांचो आस्पाव आशिल्लो. पर्यावरण अभ्यासक प्रणय बैद्य हांणी ही म्हायती दिली.
‘ग्रेट बँकयार्ड बर्ड कावंट’ हो उपक्रम दरवर्सा गोंया सयत पुराय देशांत चालीक लायतात. गोंयांत वट्ट 525 सुकण्यांची नोंद जाली. तातूंतली समान नोंदी वगळ्ळ्यार 300 सुकणीं दिशिल्लीं. गोंयांत सगळ्यांत चड 149 सुकणीं करमळी तळ्याच्या वाठारांत दिशिल्लीं. ते उपरांत सांताक्रूज दलदलीचे सुवातेर 105, बोंडला अभयारण्य वाठारांत 89, गांजे जंक्शन 72, मायणा – राय तळें 71, तांबडी सुर्ल देवूळ वाठारांत 69 जाल्यार गोंय विद्यापीठ वाठारांत 65 तरांचीं सुकणी दिसलीं.
वयल्या चार दिसांत जल्मेश कारापूरकार हांकां सगळ्यांत चड 223 सुकणीं दिसलीं. ते उपरांत प्रणय बैद्य हांकां 191, अंकुश सहानी 151, कुलदीप टोपो 142, स्टीफन मिनेझीस 140, सागर नायक 137 आनी ओमकार धारवडकार हाका 133 सुकणीं सांपडलीं. गोंयभरांत वट्ट 83 विवीध वाठारांनी सुकण्यांची नोंद केली. ह्या काळांत पुराय देशांत 1083 तरांच्या सुकण्यांची नोंद जाली. देशभरांत अझहर मुहम्मद हांणी सगळ्यांत चड 325 सुकण्यांची नोंद केली.
पश्चीम बंगालांत सगळ्यांत चड नोंदी
वयल्या काळांत पुराय देशांत पश्चीम बंगालांत सगळ्यांत चड 562 तरांच्या सुकण्यांची नोंद जाली. ते उपरांत उत्तराखंड (456), आसाम (420), कर्नाटक (387), गुजरात (373), तामीळनाडू (370) ह्या राज्यांचो नंबर लागता. हे वळेरेंत गोंय 14 वे सुवातेर आसा, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
