भांगरभूंय | प्रतिनिधी
पणजी : मडगांवच्या मोती दोंगर वाठारांतले झोपडपट्टीचें पुनर्वसन करप तशेंच ते खातीर जमीन संपादीत करचे खातीर उपाय येवजण सुचोवपाक सरकारान समितीची स्थापना केल्या. हे स वांगड्यांचे समितीचो कार्यकाळ दोन म्हयन्यांचो आसतलो. समितीच्या अध्यक्षपदार नगरपालिका प्रशासन खात्याचे संचालक आसतले. हे विशीं महसूल खात्या वतीन हालींच अधिसुचोवणी जारी केल्या.
समितींत साश्टीचे उपजिल्होधिकारी, भू नोंदणी खात्याचे निरिक्षक, मडगांव नगरपालिकेचो अभियंतो, महसूल उपजिल्होधिकारी वांगडी म्हूण काम पळयतले. जाल्यार जीसूडाचो प्रकल्प अभियंतो वांगडी सचीव म्हूण काम पळयतलो. तशेंच पुनर्वसनाच्यो अटी आनी नेम थारावपाचें काम समिती करतली. हे विशीं पीपीपी तत्वाचो वापर करचो वा राज्य जावं केंद्र सरकाराची येवजण घेवची, हाचेर समिती निर्णय घेतली. हो प्रस्न सोडोवचे खातीर सुटसुटीत आराखडो विकसीत करप, उण्यांत उणो जमनीचो दर आनी जमीन संपादन हे विशीचो निर्णय घेवपाचें काम लेगीत समिती करतली.
समितीचो कार्यकाळ दोन म्हयन्यांचो आसतलो. गरज पडल्यार सरकार हे समितीचो कार्यकाळ वाडयतलें. समितीन दर दोन सप्तकांत बसका घेवप गरजेचें आसा. हे बसकेंत जमीन संबंदान आनी पुनर्वसन संबंदांत नियाळ घेतले. समितीच्या अध्यक्षाक हे विशीं केल्ल्या कामाचो नियाल महसूल खातें तशेंच अॅडव्होकेट जनरल हांकां दिवचो पडटलो, अशें अधिसुचोवणेंत म्हणलां. मेळिल्ले म्हायती प्रमाण मुख्यमंत्री डॉ. प्रमोद सावंत हांणी 2023-24 च्या अर्थसंकल्पांत गोंयांतल्या झोपडपट्टी पुनर्वसना खातीर विचार विशेश तजवीज केल्ली. ते प्रमाण मडगांव, मुरगांव आनी पणजी वाठारांतल्या अधिसुचीत झोपडपट्ट्यांक पुनर्विकास करचे खातीर मजत दिवपाचे आशिल्ले. मोती दोंगर वाठारांतल सुमार 20 हजार चौखण मिटर जमीन संपादीत करतले. जमीन संपादना खातीर भू नोंदणी खात्या कडल्यान सर्व्हेक्षण केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
