भांगरभूंय | प्रतिनिधी
नवी दिल्ली, खबरां संस्था: संवसारांतली सगळ्यांत व्हड इलेक्ट्रीक वाहन निर्माता कंपनी ‘टेस्ला’ एप्रील सावन भारतांत कार विक्री सुरू करपाक शकता. म्हळ्यार कंपनी हांगा निर्मिती युनीट लावची ना. ती जर्मनींतले बर्लीन-ब्रांडेनबर्गच्या गीगाफॅक्ट्रींत केल्ल्यो गाडयो भारतांत हाडटली. कंपनी हांगा सगळ्यांत सवाय ईव्ही गाडी देंवोवपाची आसा. तिची किंमत २५ हजार डॉलर (२१.७१ लाख रु.) आसपाक शकता. ते खंयचे मॉडेल आसतले, हाची म्हायती दिवंक ना. मात ईव्ही गाडयां विशीं भारताच्या सध्या आयात धोरणा प्रमाण टेस्लान गाडी विक्री केल्यार २१ लाखांची ईव्ही गाडी सुमार ३६ लाख रुपयांक पडपाक शकता.
सध्या आयात केल्ल्या गाडयांचेर ७५% सीमा शुल्क लागता. मात कंपनीन केंद्रा सयत एमओयू केल्यार तांकां ३५,००० डॉलर परस चड किंमतीचे गाडयेचेर १५% सूट मेळटा. मात हे खातीर कंपनीन वर्सुकी ८ हजारां परस चड गाडयो विकच्यो न्हय. दुसरी अट, अशा कंपन्यांक ५ वर्सांनी भारतांत निर्मिती सुरू करची पडटली. मजगतीं, हें धोरण बदलपाची चर्चा आसा. मार्च निमाण मेरेन नवें धोरण येवपाची शक्यताय आसा.
मॉडेल ३ आनी वाय हाडपाचीय चर्चा
अशी चर्चा आसा, टेस्लाचेे धनी एलन मस्क सुरवातेक मॉडेल ३ आनी मॉडेल वाय गाडीय लॉंच करपाक शकतात. मात दोनूय मॉडेल्सचें आंतरराष्ट्रीय बाजारांत मोल ४४ हजार डॉलर परस चड आसा. टेस्ला भारतीय बाजारा खातीर हे गाडयेचें स्पेसिफिकेशन्स कशे एडजस्ट करता हें पळोवचें पडटलें. तशें पळयल्यार भारतीय गाडी बाजाराचो सभाव मुल्याधारीत आसा. अशा वेळार टेस्लान म्हारग गाडयो हाडल्यार विक्रेचेर परिणाम जावपाक शकता. कंपनीन भारतांत पयल्या दोन शोरूमां खातीर सुवात निश्चीत केल्या. पयली सुवात नवी दिल्लीच्या एअरोसिटी क्षेत्र इंदिरा गांधी आंतरराष्ट्रीय विमानतळा लागसारा आसा, जाल्यार मुंबयच्या बांद्रा कुर्ला कॉम्प्लेक्सांत दुसरी सुवात निश्चीत केल्या. हें छत्रपती शिवाजी महाराज आंतरराष्ट्रीय विमानतळा लागसारचें मुखेल बिझनेस हब जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
